பேசாத வார்த்தைகள் அழகானவை ...!

பேசாத வார்த்தைகள் அழகானவை ...!

எம் உலகம் பேசாத வார்த்தைகளால் நிறைந்திருக்கின்றது ..!

எழுதாத வார்த்தைகள் அழகானவை ...!

எம் உலகம் எழுதாத வார்த்தைகளால் நிறைந்திருக்கின்றது ..!

ஆம் , எம் உலகம் வெளிப்படுத்தாத அழகியல்களால் நிறைந்தது . ஏதேதோ பேசவேண்டுமென்றும், எழுதவேண்டுமென்றும் எண்ணுகின்றேன் , ஆனால் எதை எதையோ உளறுகின்றேன் பேச்சாக, எதை எதையோ கிறுக்குகின்றேன் எழுத்தாக. எம்மிடம் வெளிப்படுத்தப்படாத உளறல்களும், கிறுக்கல்களும் நிறைந்துகிடக்கின்றன அழகழகாக  .

காலையில், தாயோ , தாரமோ பரிமாறும் உணவில் உப்போ, காரமோ சிறிதேனும் அதிகமாகிவிட்டாலும் வார்த்தைகள் வெடித்து கிளம்புகின்றன . எப்பொழுதுமே தயங்கியதில்லை வெறுப்பையும் , கசப்பையும் உமிழ . ஒருநாளேனும், உணவு நன்றாக இருந்ததாக வாய் விட்டு வார்த்தைகளை வழங்கியதில்லை . பேசாத வார்த்தைகள் அழகானவை ...!

சக அலுவலகர் வேலையில் அறியாமல் செய்யும் தவறை, பலர் அறியப்படுத்துவதிலும் , குத்திக்காட்டுவதிலும் இருக்கும் வேகமும் , ஆர்வமும் . சிறந்த வேலைகளை அவர் செய்யும் போது காணக்கிடைப்பதில்லை . நல்ல வார்த்தைகள் உள்ளேயே நங்கூரமிட்டு நகர மறுக்கின்றன. பேசாத வார்த்தைகள் அழகானவை ...!

பொருந்தாத ஆடைகளை உடுத்தி வரும் நண்பனை பார்த்ததும் , கேட்காமலே சொல்கிறேன் கேவலமாக இருக்கிறதென்று . அவனே தேந்தெடுத்தெடுத்த உடைகளில் அழகாக வரும்போது , அவன் கேட்டாலுமே, நன்றாக இருக்கிறதென்ற வார்த்தை, நன்றாகவே வெளிவருவதில்லை. மனம் ரசித்தாலும் , குணம் ஏதேதோ குறைகளை தேடுகின்றது . அவன் பார்க்காத கணத்தில் பார்வை அவன் ஆடைகளை ரசிக்கிறது .  பேசாத வார்த்தைகள் அழகானவை ...!

கீரை விய்க்கும் பாட்டியிடமும் , செருப்பு தைக்கும் பெரியவரிடமும் வியாபாரத்தில் பேரம் பேசும் நாக்கு , மால்களிலும் , சூப்பர்மார்க்கெட்களிலும் நடக்கும் பகல் கொள்ளைகளை பார்த்ததும்  வறண்டுவிடுகின்றது . நியாயமும் , நிஜமும் , உரிமையும்  பேசும் அந்த  வெளிப்படுத்தாத, பேசாத வார்த்தைகள் அழகானவை ...!

  

குழந்தைகளை பார்க்கும்போதெல்லாம், என் அறிவையும் , அனுபவத்தையும் அகற்றி வைத்து அவர்களின் செம்மொழியான மழலை மொழியில் பேச வேண்டுமென்றே நெருங்குகின்றேன் . அவர்களை விட்டு விலகும்போதுதான் தெரிகின்றது நான் பேசவில்லை, என் அறிவையும் , அனுபவத்தையும் வைத்து பிதற்றியிருக்கிறேன் என்று . பேசாத வார்த்தைகள் அழகானவை ...!

ஒவொருமுறை பயணத்தின் போதும் , நடத்துனரையும் , ஓட்டுனரையும் வசைபாடியிருக்கிறேன் உருட்டுகிறார்கள் என்றும், கேட்க சகிக்காத பாடல்களை ஒளிபரப்புகிறார்கள் என்றும் , சில்லறை இல்லாததற்கு எரிந்து விழுகிறார்கள் என்றும் . ஆனால் நல்ல நல்ல பாடல்களை ஒளிபரப்பிய போதும் , சீரான வேகத்தில் சரியான நேரத்தில் எம்மை கொண்டு சேர்த்த போதும் , சில்லறை இல்லையா கண்ணு என்று பரிவாகவும் , பாசமாகவும் கேட்டபோதும் ஒரு நடத்துனரையோ , ஓட்டுனரையோ பாராட்டியதில்லை. ஏன், நன்றி என்று ஒரு வார்த்தை கூட உளமார உள்ளத்தில் இருந்து உதிர்த்ததில்லை . பேசாத வார்த்தைகள் அழகானவை ...!

  

சக அலுவலகர்களை விட குறைவான ஊதிய உயர்வு பெற்ற ஒவ்வொருமுறையும் , பார்க்கும் அனைவரிடமும் வலியப்போய் வெளிப்படுத்தியிருக்கிறேன் எம் மனக்குமுறல்களை. எரிமலை வெடித்ததுபோல எம் உணர்வுக்கொப்பளிப்பை மேலாளரிடம் கொட்டியதுண்டு. ஆனால் அதிகமான ஊதிய உயர்வோ , நியாயமான ஊதிய உயர்வோ பெற்ற ஒருமுறை கூட,  யாரிடமும் பகிர்ந்ததில்லை எம் சந்தோசத்தை, சந்தோசமாக . மேலாளருக்கு ஒரு நன்றியை கூட சொன்னதில்லை . பேசாத வார்த்தைகள் அழகானவை ...!

நான் செய்யாத ஒரு செயலுக்கு கிடைக்கும் தண்டனையை , திடம் கொண்டும், உணர்வுகொண்டும் வார்த்தைகளை தேடித்தேடி பேசி, முழு மூச்சாக மறுக்கின்றேன். எம் செயலை முடிந்த அளவுக்கு நியாயப்படுத்துகின்றேன் . அதே சமயம் நான் செய்யாத செயல்களினால் எமக்கு கிடைக்கும் அங்கீகாரத்தையும் , பாராட்டையும் அப்படியே ஏற்றுக்கொள்கிறேன் . ஒரு வார்த்தை கூட வரமறுக்கிறது, நான் அவன் இல்லை என்றும் , அந்த செயலை செய்யவில்லை என்றும் .  பேசாத வார்த்தைகள் அழகானவை, உண்மையானவை  ..!

 

எம் பிரியமான நண்பனுக்கும் , பெற்றோர்க்கும் , மனைவிக்கும் பேசமுடியாத உணர்வுகளை , வார்த்தைகளை , எழுத்தாக வார்த்தெடுத்து அனுப்ப விழைகின்றேன் . ஆனால் கடிதம் எழுதும் ஒவ்வொருமுறையும் சம்பிரதாயமாகவே ஆரம்பித்து சம்பிரதாயமாகவே முடிக்கின்றேன் . எழுதப்படாத வார்த்தைகளும் , எழுதி, அஞ்சலுக்கு அனுப்பப்படாத கடிதங்களும் எண்ணிலடங்கா இருக்கின்றது எம் மனதில் . எழுதாத வார்த்தைகள் அழகானவை ...!

படிக்கும் போது, தன்னிலை மறந்து சில பதிவுகளும் , படைப்புகளும் எம்மை சிரிக்க வைக்கிறது , சிந்திக்க வைக்கிறது . ஒரு சில கதைகளையும், கட்டுரைகளையும் மனம் ரசிக்கிறது , சில கவிதைகளில் மனம் லயிக்கிறது அப்பொழுதெல்லாம் அதை எழுதியவர்களுக்கு ஒரு நன்றியையோ , பாராட்டையோ எழுத மனம் வருவதில்லை . பொறாமையோ , சோம்பெறித்தனமோ தடுத்துவிடுகின்றது . அப்படியே எழுதினாலும் நான்கு எழுத்துக்களுடனோ இல்லை நான்கு வார்த்தைகளுடனோ முடித்துக்கொள்கிறேன். அதே சமயம் நான்கு வரிகளுக்கு மேல் நீளும் எந்த ஒரு பின் கருத்தும், நிச்சயமாக எதிர்ப்பு கருத்தாகவோ இல்லை மறுப்பு கருத்தாகவோ தான் இருக்கின்றது . எழுதாத வார்த்தைகள் அழகானவை ...!

பேசாத வார்த்தைகள் அழகானவை ...!

எம் உலகம் பேசாத வார்த்தைகளால் நிறைந்திருக்கின்றது ..!

எழுதாத வார்த்தைகள் அழகானவை ...!

எம் உலகம் எழுதாத வார்த்தைகளால் நிறைந்திருக்கின்றது ..!