Apr 5, 2017

பேசாத வார்த்தைகள் - 050417 : லெக்ஷ்மி | நேஷனல் சில்க்ஸ் | கனவு வாரியம்









சமீபத்தில் கேட்க, கேட்க பிடித்துப்போனது லெக்ஷ்மி சிவனேஸ்வரலிங்கத்தின் குரல் . போகன் படத்தின் செந்தூரா பாடல் லெக்ஷ்மியின் முதல் திரையிசைப்பாடல். வழக்கமாக இமான் இசைக்கும் படங்களில் ஷ்ரேயாகோஷலின் குரல் தான் கவனம் ஈர்க்கும். போகனிலும் ஸ்ரேயா உண்டு . ஆயினும் லெக்ஷ்மி செவியீர்க்கிறார். உருவத்திலும் , குரலிலும் முறையே சாய் பல்லவியையும் , சித் ஸ்ரீராமையும் நினைவுபடுத்துகிறார். லேடி சித் ஸ்ரீராம் என்றுகூட சொல்லலாம் . அப்படியொரு ஆளுமை நிரம்பிய அழுத்தமான குரல் . செந்தூரா பாடலின் மற்றுமொரு சிறப்பம்சம் தாமரையின் வசியம் செய்யும் வரிகள் .

“அலைந்து நான் களைத்துப் போகும்போது அங்கே
மெலிந்து நான் இளைத்து போவதாய் சொல்லி ,
வீட்டில் நளபாகம் செய்வாயா ;
பொய்யாய் சில நேரம் வைவாயா, நான்
தொலைந்து போனால் உனை சேரும் வழி சொல்வாயா...!”

பாடல் என்றதும் எங்கே இவர்கள் என்று கேட்கத்தோன்றும் இருவர் , ஜிப்ரான் & ஆலாப் ராஜ். சமீபத்தில் இவர்களிருவரையும் கேட்ட நினைவில்லை. என்னாச்சு ...?


திருப்பூரில் , பொழுதுபோக்க சொல்லிக்கொள்ளும் படியாக ஒன்றும் இல்லை , சென்னையானால் வள்ளுவர் கோட்டம் , பீச் என்று எங்காவது சல்லிசான செலவில் நாள் பூராவும் சுத்திவரலாம் . மதுரை , திருச்சிகளில் கோவில்கள் , அணைகள் என்று எப்படியாவது அரைப்பொழுதை கழித்துவிடலாம். கோவை என்றால் கூட பரவாயில்லை ஷாப்பிங்கிற்காகவும் , விண்டோ ஷாப்பிங்கிற்காகவும் என்று ஒன்றுக்கு இரண்டாக மால்கள் உண்டு . திருப்பூர் மாதிரியான ஊர்களில் ரெம்ப கஷ்டம். தடுக்கி விழுந்தாலும் தடுக்காமல் விழுந்தாலும் அது ஒரு பனியன் கம்பெனியாகதான் இருக்கும். அதிகபட்ச பொழுதுபோக்கும் ஸ்தலம் திரையரங்கை தவிர்த்து வேறொன்றுமில்லை .

ஞாயிற்றுகிழமைகளில் போரடித்தால் அப்படியே டவுன்பஸ்ஸில் ஏறி திருப்பூர் பழைய பஸ் ஸ்டாண்டை ஒட்டிய கடை வீதிகளை ஒரு சுத்து சுத்தி வருவதுண்டு . அப்படியொரு சுத்தல் முடிந்து, வீடு திரும்ப கடைவீதி கார்னரில் நின்று கொண்டிருக்கும் போதுதான் கவனித்தேன் அந்த கடையை. பரபரப்பான கடைவீதியின் கடைக்கோடியில் பத்துக்கு இருபது அளவில் ஒரு அறையில் புத்தகக் கடை . நேஷனல் சில்க்ஸ்க்கு சொந்தமான கடை . இயற்கை வழி விளைவித்த பொருட்களையும் , தமிழ் மற்றும் ஆங்கில புத்தகங்களையும் வியாபாரம் செய்துகொண்டிருக்கிறார்கள். அவசியமே இல்லைதான் , மூன்று டன் ஏ.சி யை மாட்டிவிட்டு புதுபொலிவுடன் விரிவுபடுத்தப்பட்ட பட்டுப்புடவை செக்ஷன் என்று விளம்பரப்படுத்தி கல்லாவை நிரப்பாலம்தான் ஆனால் செய்யவில்லை. மேற்படி நிறுவன உரிமையாளருக்கு புத்தகம் மீது அளவற்ற பிரியமுண்டென்றும் , அவரது தோட்டத்து வீட்டில் ஒரு குட்டி நூலகமே வைத்திருப்பதாகவும் கடைச் சிப்பந்தி சொல்லிகொண்டிருந்தார்.
மேற்படி கடையை ஒட்டினாற்போலயே நேஷனல் சில்க்ஸ் ஜவுளிக்கடையும் இயங்குகிறது .கடைக்கு செல்வோருக்கு தாழ்வுமனப்பான்மையை ஏற்படுத்தாத அளவிலான அலங்காரங்களுடன் , எளிமையான , இயல்பான புன்னைகையுடன் கனிவாக வரவேற்கும் கடை சிப்பந்திகள் வெகுவாக கவர்கிறார்கள் . நியாயமான விலையில் தரமான ஜவுளிகளுக்கு அவசியம் நாடலாம் நேஷனல் சில்க்சை .


கனவு வாரியம் . இண்டர்நேஷனல் அளவில் கவனம் ஈர்த்த படமென்று நாளிதழ்களில் , சமூக ஊடகங்களிலும் பேசப்பட்ட படம் . சமீபத்தில் காணக் கிடைத்தது . ஆராய்ச்சியையும், சுய தொழிலையும் , இயற்கை விவசாயத்தையும் வலுவாக ஆதரித்து பேசும் ஒரு பாடம். டாக்குமென்றித்தனமான படமாக தோன்றினாலும் போரடிக்கவில்லை. பொதுவாக இந்தியர்கள் குறிப்பாக சமகால தமிழர்கள் வேலைக்கு செல்வதையே விரும்புகிறார்கள் . தப்பித்தவறி யாரேனும் சொந்தத் தொழில் செய்யபோகிறேன் என்று சொன்னால் , ஏதோ சூசைட் செய்யப்போகிறவனை போலவே இந்த சமூகம் பார்க்கிறது ; அறிவுரைக்கிறது . இதையெல்லாம் தாண்டி ஆராய்ச்சி செய்யபோகிறேன் என்று சொன்னால் சர்வ நிச்சயமாய் சம்பந்தப்பட்டவரை கொண்டுபோய் மனநல மருத்துவமனையில் அனுமதித்துவிட்டுதான் அமர்வார்கள் நம்மாட்கள் . கொஞ்சம் யோசித்துப் பாருங்கள் உங்கள் சுற்றத்தில் , நட்பில் எத்தனை பேர் சொந்தத் தொழில் செய்கிறார்கள் ; எத்தனை பேர் ஆராய்ச்சியில் ஈடுபட்டிருக்கிறார்கள் . முன்னதில் சொற்பமாகவும் பின்னதில் அரிதினினும் அரிதாகவும் இருப்பார்கள்.

கம் டு தி மூவி . டிஜிட்டல் டீ.ஆராய் ஆணழகன் சிதம்பரம் . சுண்ணாம்புச் சுவராய் ஈ... ஈ.. என்று வலம் வருகிறார் போதாக்குறைக்கு குரல் வேறு கும்மியடிக்கிறது  . மற்றபடி அனைத்து கதாபாத்திரங்களும் கச்சிதம் . ஐ டி கம்பெனி டூ விவசாயியாக வரும் பாத்திரம் அவ்வளவு பக்குவம் . படத்தில் வெகுவாக கவர்ந்தது வசனம் . கொஞ்சம் பட்டி , டிங்கரிங் பார்த்து கதையின் நாயகனாய் வேறு யாரையேனும் போட்டிருந்தால் இன்னும் அதிகமானோரை சென்று சேர்ந்திருக்கும் கனவு வாரியம்.


என்றென்றும் புன்னகையுடன்
ஜீவன்சுப்பு.

Mar 14, 2017

பேசாத வார்த்தைகள் - 13.03.17 : திருப்பூர் செட்டியார் கடை.



சினிமாக் காதலர்கள் எல்லோருமே, உணவுக் காதலர்களாகவும் இருப்பதில்லை. ஆனால் , பெரும்பான்மையான உணவுக் காதலர்கள் சினிமாக் காதலர்களாகவும் இருக்கிறார்கள்.  எல்லோருடைய நட்பு வட்டத்திலும் குறைந்தபட்சம் யாரேனும் ஒருவராவது சினிமா கம் உணவுக் காதலராக இருப்பார். எமது அலுவலகத்திலும் அப்படியொருவர் உண்டு. வயதிலும், பதவியிலும் மூத்தவர் என்றபோதிலும் தன்மையாக பழகக்கூடியவர். வாரத்திற்கு குறைந்தபட்சம் ஒரு படம் இரண்டு, மூன்று ஹோட்டல் சிட்டிங் தவறாமல் இடம்பெறும் அவரது செட்யூலில்.

பலமுறை அழைத்தபோதும் , போகலாம் என்று திட்டமிட்ட போதும் மேற்படி காதலருடனான சிட்டிங் தள்ளிப்போய்கொண்டே இருந்தது . சென்ற மாதத்தில் ஒரு நாள் இரவு , திடீர் முடிவாக, அலுவலகம் முடிந்தவுடன் இன்னபிற இரு அலுவலக நண்பர்களுடன் செட்டியார் கடைக்கு படையெடுத்தோம் .

திருப்பூரில் , டவுன்ஹால் அருகில் , சிவா டெக்ஸ்டைல் எதிர்புறம் உள்ள வீதியில் நுழைந்து , வலது புறம் உள்ள சந்தின் கடைக்கோடியில் உள்ள கடைதான் தி பேமஸ் செட்டியார் கடை . அசைவத்திற்கு பெயர் பெற்ற கடை . கிட்டதட்ட ஒரு சாலையோர முனியாண்டி விலாஸ் போன்ற தோற்றம் . செட்டியார் கடைக்கு ஆடி காரில் வந்தெல்லாம் சாப்பிடுகிறார்கள் என்று தோசைக்கல்லில் அடித்து சத்தியம் செய்தால் கூட நம்பமுடியாது. ஆனால் , அதுதான் உண்மை . சமயங்களில் உட்காருவதற்கு கூட இடம் கிடைக்காது.

கடைக்கு எதிர்புறம் மரத்தடியிலும் நாலைந்து டேபிள் சேர் போட்டிருக்கிறார்கள் . ஓபன் ரூஃப் பிரியர்கள் சிலர் பியர்களுடன் சமீபித்திருந்தார்கள் . தவிர்த்து, வெகு அருகிலேயே கூரையுடன் கூடிய உணவருந்தும் கூடமும் உண்டு . வண்டியை பார்க் செய்துவிட்டு மேற்படி கூடத்தில் தஞ்சமடைந்தோம். குதூகலத்துடன் ஒரு வாலிப பட்டாளமும் , ஒன்றிரண்டு குடும்பமும் ஏற்கனவே செட்டியார் கடையை காலி செய்யும் நோக்குடன் , கோழிகளையும் முட்டைகளையும் சுவீகரித்துக்கொண்டிருந்தார்கள். பொதுவாக நான் உணவு விசயத்தில் எந்த பரீட்சார்த்த முயற்சியிலும் ஈடுபடுவதில்லை . வசந்த பவனோ , கையேந்தி பவனோ இல்லை தலைப்பாகட்டியோ , மெனு கார்டை அட்டை டூ அட்டை மேய்ந்துவிட்டு , நாலு இட்லி ஒரு வீட்டு தோசையோடு முடித்துக்கொள்வேன் . பட் , இந்த முறை அதற்கான வாய்ப்பே இல்லை . இதுவரை வாயில் நுழைந்திடாத , காதால் கேட்டிராத சில பல அயிட்டங்களை காதலர் ஆர்டர் செய்துகொண்டிருந்தார் .

நாங்கள் சென்றிருந்த அன்று பிரதோஷம் . என்னுடன் வந்த பிறிதொரு நண்பருடன் சேர்த்து நானும் பிரதோஷத்தன்று அசைவம் சாப்பிடுவதில்லை. எல்லோருக்கும் தலா ரெண்டு நெய் புரோட்டாவும் , சைடிஷாக ஒரு சில மாசலா கிரேவிகளையும் ஆர்டர் செய்தார். புரோட்டாவுக்கு தொட்டுக்கொள்ள, காசு கொடுத்து கிரேவி வாங்கவேண்டுமேன்பதை என்னால் ஜீரணித்துகொள்ளவே முடியவில்லை . நெய் புரோட்டாவை சாப்பிடுவதற்க்கெல்லாம் முப்பத்தியிரண்டு பற்களும் முழு பலத்துடன் இருக்கவேண்டும் . அடித்து நொறுக்கி புரோட்டவை மென்று முழுங்குவதற்குள் தாவு தீர்ந்துவிட்டது.

அடுத்தடுத்து ஆர்டர் செய்த அசைவ அயிட்டங்கள் ஒவ்வொன்றாக டேபிளில் படைக்கப்பட்டன . காதலர் எங்களுக்கு “பெப்பர் எக்” கை சிபாரிசு செய்தார் . பட் ,  பிரதோஷத்தன்று நாங்கள் டீ டோட்டலராக்கும் என்று சொல்லி மறுத்து விட்டோம் . முத்தமிடத்தூண்டும் இதழ்களைப் போல , அவர்களுக்கு படைக்கப்பட பெப்பர் எக் எங்களை கட்டி இழுத்தது  , அதன் வாசனை நாசி கடந்து , நரம்புகளையெல்லாம் தூண்டியது .  வெகு பிரயாசைப்பட்டும் அடக்கமுடியவில்லை. சக பிரோதஷ பார்ட்டியை பார்த்தேன் , அவர் கண்கள் , முட்டையை சைவத்தில் சேர்த்துக்கொள்ளலாமே என்று இரைஞ்சுவதாக பட்டது . இரண்டு சுற்று பார்வை பரிமாற்றத்திற்கு பின் ஏகமனதாக முட்டையை சைவத்தில் சேர்த்து இதழ்களில் வாய் பதித்தோம் .

அழகாக நறுக்கிய, நாட்டுகோழி முட்டையின் வெண் சுளையில் கொஞ்சம் அதிகப்படியாக மிளகுப்பொடி போட்டு , பொன் நிறத்தில் எண்ணெயில் வறுத்த அந்த முட்டையின் சுவை கட்டையில் போகின்ற வரை மறவாது . நாங்கள் அத்தோடு நிறுத்திக்கொள்ள  , மற்ற இருவரும் இன்னும் சில உயிரினங்களை கொன்று தின்று கொண்டிருந்தார்கள் . கடைசியாக இரண்டு பிளேட் தயிர் சாதம் கோரினார் காதலர் . இதென்னங்க காம்பினேஷன் என்று ஜெர்க் ஆனதற்கு, அதீத காரத்தை ஆற்றுப்படுத்த என்று பதிலுரைத்தார். எங்களுக்கு வேண்டாமென்று சொல்லி வெளியேறிய பத்தாவது நிமிடத்தில் வயிற்றிலுருந்து தொண்டை வரைக்கும் கப கப வென்று ஆசிட் . பெப்பர் தன் வேலையை காட்டு காட்டென்று காட்ட ஆரம்பித்துவிட்டது . மறுபடியும் போய் தயிர் சாதம் கேட்பது உசிதமில்லை என்று உஷ் கொட்டியவாறே பழரசக் கடையை தேடிக்கண்டுபிடித்து அடைக்கலமானேன் .

ஜிஞ்சர் வித் லெமன் சோடா ஆர்டர் செய்தோம் , நறுக்கிய இஞ்சி , அரை சிட்டிகை உப்பு , அளவான சர்க்கரை கொஞ்சமாக எலுமிச்சை என்று பெர்பெக்ட் கலவையில் மெல்லிய ஜில்லிப்புடன் கூடிய பானத்தை அருந்திய பின்தான் அமிலம் கொஞ்சம் மட்டுப்பட்டது.

நீங்கள் அசைவ விரும்பியா , உங்களுக்கு காரமெல்லாம்  கடலை மிட்டாய் சாப்பிடுவது போன்றா ..? அப்படியென்றால் உங்களுக்கான சரியான தேர்வாக செட்டியார் கடை இருக்கும் . காரம் ஆகாதுன்னு சொல்றவங்க கடை பக்கத்துல கூட போயிடாம  தூரமா ஓடி போயிடுங்க ...! அதான் நல்லது உடம்புக்கும் & பர்சுக்கும்.

என்றென்றும் புன்னகையுடன்
ஜீவன்சுப்பு

Mar 1, 2017

பேசாத வார்த்தைகள் : கண்ணதாசன் , குருகுலம் , சுகன்யா ஸம்ரிதி யோஜனா.


     
அர்த்தமுள்ள இந்து மதம் உட்பட கண்ணதாசனின் பத்து புத்தகங்கங்கள் அடங்கிய மின் நூலை நண்பர் ஒருவர் கட்செவி அஞ்சலில் பகிர்ந்திருந்தார். கிட்டத்தட்ட 1000 பக்கங்கள். RANDOM ஆக தினமும் ரெண்டு மூணு பக்கங்களை வாசிக்கிறேன். இன்று அமராவதிபுதூர் குருகுலத்தை பத்தி ஒரு பத்தி ...!

குருகுலத்தில் பயிலும் ஒவ்வொரு மாணவருக்கும் விடுதி எண் உண்டு. கிட்டத்தட்ட பெயருக்கு இணையானது விடுதி எண் . விடுதி எண்னை சொன்னால் வீட்டு எண் வரை வரலாற்றையே சொல்லிவிடுவார்கள். கவியரசருக்கு 498 ஆம் எண். அவர் படித்த காலத்தில் ஒவ்வொரு மாணவருக்கும் பத்துக்கு பத்து சதுர அடி விவசாய இடத்தையும், நால்வருக்கொன்றாக பசு மாட்டையும் கொடுத்து பராமரிக்க வேண்டும் என்பதும் கல்வியாக இருந்திருக்கிறது. கூடவே குருகுல வளாகத்திலேயே அமைக்கப்பட்டிருந்த  தறியில் அவரவருக்கான வேஷ்டியை மாணவர்களே நெய்துகொள்ள வேண்டுமாம். சில வருடங்கள் பாட்டு வகுப்பும், இசை வாத்திய வகுப்பும் கூட பயிற்றுவித்திருக்கிறார்கள் மாணவர்களுக்கு .

இதையேதான் இப்பொழுது CBSE, STATE BOARD என்று போர்டு வைத்து கொள்ளையடித்துக் கொண்டிருக்கிறார்கள். குருகுலத்தில் ஒழுக்கத்திற்கு தான் முன்னுரிமை. நீங்கள் ஏழாம் வகுப்பையே எட்டு வருடங்கள் படித்தாலும் பிரச்சினையில்லை. காந்திய கொள்கையை ஒற்றிய பாடத்திட்டத்தையும் , பழக்கவழக்கங்களையும் கொண்டியங்கும் கல்விச்சாலை. நாங்கள் படிக்கும்போது மேற்படி கண்ணதாசன் காலத்திய கல்வி முறை இல்லை. இருந்திருந்தால் இன்னும் சிறப்பான வாழ்வியலை அனுபவித்திருக்கலாமோ என்ற எண்ணம் எழுகின்றது இப்பொழுது.

பெரும்பாலானவர்கள் குருகுலம் என்றால் , நந்தா படத்தில் சூர்யாவை சேர்த்திருப்பார்களே அதுவா என்று கேட்கிறார்கள். இல்லை. அது சிறுவர் சீர்திருத்தப்பள்ளி. அது தண்டனை...! இது பெற்றவர்களின் விருப்பத்தின் பேரில் சேர்க்கப்படும் உண்டு உறைவிடப் பள்ளி. காலை ஐந்து மணி முதல் இரவு ஒன்பது மணி வரையிலான ராணுவ ஒழுங்குடன் கூடிய டைம்டேபிள் . இருக்கப்பிடிக்காமல் , சாக்கடை பொந்துக்குள் புகுந்து தப்பித்தவர்கள், நடு சென்டரில் சிக்கி சின்னாபின்னமானவர்கள் எல்லாம் உண்டு. நமக்கு எலிப் பொந்தே போதுமானதாக இருந்தாலும், எப்படியும் அடித்து துவைத்து  மறுபடியும் குருகுலத்தில் தான்  கொண்டுவந்து காயப்போடுவார்கள் என்று தெரிந்தமையால் சமத்துப்பிள்ளையாகவே ஐந்து வருடங்களையும் கடத்தியாயிற்று. குருகுலத்தில் படிக்கும் போது மாணவர்கள் அனைவருமே அதை தண்டனையாகவே கருதினோம். இப்பொழுது கேட்டால் குருகுல வாசம்தான் தற்சமயம் இருக்கும் சிற்சில நல் பழக்கவழக்கங்களுக்கும் , ஓரளவேனும் நன்றாக இருப்பதற்கும் காரணம் என்று சொல்வோம்.

எனது விடுதி எண் 102. சமீபத்தில் இணையத்தின் வழியாக குருகுல மாணவர் ஒருவரின்  தொடர்பு கிடைத்தது. அண்ணே அவரா நீங்க...?! அடையாளமே தெரியலையே என்று ஜெர்க் ஆனார் . மேற்படி குருகுல வாசத்தில் ,அடியேன் பெரும்பாலும் தொள தொள சட்டையும், நெற்றி நிறைய பட்டையும், கழுத்தில் ருத்திராட்ச கொட்டையுமாகத்தான் திரிவேன். அதுதான் ஜுனியர் ஜெர்க் ஆனதன் காரணம். ஏதோ ஒரு மடத்தின் மடப்பள்ளியில், புளிச் சோறு உருட்டிக்கொண்டிருப்பான் என்று நினைத்த ஒருவன்,  ஜீன்ஸ் போட்டு மூஞ்சி புத்தகத்தில் ஸ்டேட்டஸ் போடுவேனென்று கனவிலும் எதிர்பார்த்திருக்கமாட்டான்.
     
ஆயிற்று, குருகுலத்தை விட்டு வந்து பதினெட்டு வருடங்கள் ஆயிற்று. விரைவில் ஓர் எட்டு போய் வரவேண்டும்

**********************************************************************************************************************************
ASSET ம் இல்லை LIABILITY ம் இல்லை, கிட்டத்தட்ட ஒட்டியும் ஒட்டாத வாழ்க்கையைத்தான் ஓட்டிக்கொண்டிருக்கிறேன். இது வருமான வரி கணக்கு பைசல் பண்ண வேண்டிய நேரம் . எதைத்தின்றால் பித்தம் தெளியும் என்பதுபோல எந்தெந்த வகையில் வரி செலுத்தாமல் எஸ்கேப் ஆகலாம் என்று ஆளாளுக்கு ஆலாய்ப் பறக்கின்றார்கள் .

மேற்படி வருமான வரி தொடர்பான , சேமிப்பு திட்டங்கள் பற்றி இணையத்தில் உலாவியதில் கண்ணில் பட்டது ஒரு உருப்படியான திட்டம் . இந்திய அரசின் , பிரதமர் மோடி அமைச்சரவையினால் அறிமுகப்படுத்தப்பட்டசுகன்யா சம்ரிதி யோஜனா திட்டம் ( தமிழில் செல்வமகள் சேமிப்புத்திட்டம் ) .

ரெம்ப காம்பெக்டான ஒரு திட்டம் , கண்ணைக்கட்டும் கண்டிப்புகளோ , கழுத்தை நெரிக்கும் அளவிற்கான தவணையோ இல்லாத வெகு நெகிழ்வான ஒரு திட்டம் . பெண் குகந்தைகளின் கல்வி மற்றும் திருமணச் செலவுகளை மனதில் வைத்து கொண்டுவரப்பட்டிருக்கின்றது .

திட்டத்தின் சாதக பாதகங்கள்

Ø      பெண் குழந்தைகளுக்கான எளிய சேமிப்புத்திட்டம் .
Ø      பத்து வயது வரை உள்ள பெண் குழந்தைகளுக்கு தொடங்கலாம்.
Ø      ஒரு வருடத்திற்கு குறைந்தபட்சம் ஆயிரம் ரூபாயிலிருந்து அதிகபட்சமாக லட்சத்து ஐம்பதினாயிரம் வரை கட்டலாம்.
Ø      நூரின் மடங்காக எவளவு வேண்டுமானாலும் எத்தனை தவணையில் வேண்டுமானாலும் கட்டலாம்.
Ø      பதினான்கு வருடங்கள் தொடர்ந்து கட்டவேண்டும்.
Ø      வேறு எந்த சேமிப்பு திட்டங்களிலும் கிடைக்காத அளவிற்கான வட்டி இதில் கிடைக்கும்
Ø      ஆரம்பித்த வருடத்தில் 9.1 சதவிகித வட்டியும் தற்சமயம் 8.6 சதவிகித வட்டியும் வழங்கப்படுகின்றது .
Ø      தபால் நிலையம் மற்றும் அரசு வங்கிகளின் எந்த கிளையில் வேண்டுமானாலும் கணக்கு தொடங்கலாம் . எந்தக் கிளைக்கு வேண்டுமானாலும் மாற்றிகொள்ளும் வசதியும் உண்டு .
Ø      ஆதார் அட்டை , பான் கார்டு , பாஸ்போர்ட் இதில் ஏதாவது ஒன்றும குழந்தையின் பிறப்புச் சான்றிதழும் இருந்தால் போதும் .
Ø      EEE என்று சொல்லப்படும் வரிவிலக்கு வசதி உண்டு . அதாவது இதில் செய்யப்படும் முதலீடு ,கிடைக்கும் முதிர்வுத்தொகை மற்றும் வட்டி இவை மூன்றிற்கும் வருமானவரி விலக்கு உண்டு.

பாதகம் என்று பார்த்தால் ,

Ø      பதினெட்டு வயதிற்கு முன்பாக அவ்வளவு எளிதில் பணத்தை எடுக்க முடியாது.
Ø      21 வருடங்கள் கழித்துதான் முதிர்வுதொகை கிடைக்கும்.
Ø      ஒரு வேளை அதற்கு முன்பாகவே திருமணம் நிச்சயிக்கப்பட்டால் மட்டுமே பணத்தை திரும்ப பெற முடியும்.
Ø      குழந்தையின் பதினெட்டாவது வயதில் கல்விக்காக ஐம்பது சதவிகிதம் மட்டுமே எடுக்கமுடியும் .
Ø      ஐந்து வயதிற்குட்பட்ட குழந்தைகளுக்கு மட்டுமே முழு பயன் கிடைக்கும் .
Ø      நிலையற்ற வட்டி விகிதம்.
Ø      இணையத்தின் வாயிலாக கணக்கை ஆரம்பிக்கவும் இயலாது , பணம் செலுத்தவும் இயலாது .

இன்றைய கல்யாண கள நிலவரங்களை வைத்துப் பார்த்தால் , ஆக்சுவலி இந்த திட்டம் ஆண் குழந்தைகளுக்குத்தான் ஆரம்பிக்கப்பட்டிருக்கவேண்டும் . இன்றைக்கே  திருமணத்திற்கு பெண் கிடைக்காமல் திண்டாடிக் கொண்டிருக்கிறார்கள் ஆண்கள் . இன்னும் இருபது வருடங்கள் கழித்து நிச்சயமாக பையன் வீட்டார்தான் வரதட்சணை கொடுத்து பெண் எடுக்க வேண்டியதிருக்கும் .

என்றென்றும் புன்னகையுடன்

ஜீவன்சுப்பு .

Jan 15, 2017

பேசாத வார்த்தைகள் : 15.01.2017 - ஆயிரங்கால் மண்டபம்




ஆயிரங்கால் மண்டபம்

புது வருடத்தை புத்தகத்துடன் தொடங்கலாம் என்ற நல்லெண்ணத்தின்பால் அருகிலுள்ள கிளை நூலகத்தினை அணுகினேன். நூலகங்களில் புத்தகம் தெரிவு செய்வதற்கு ஒரு தனித்திறமை தேவை . அது எமக்கு இன்னமும் கைவரப்பெறவில்லை. பகுதி புத்தகங்கள் அரசியல் புத்தகங்களாகவும் , மிகுதி புத்தகங்கள் அரசியலால் வந்த புத்தகங்களாகவும் இருக்கிறது .

நூலகப் பணி நேரம் முடியும் நேரம் அது  , பகுதி நேரப் பணியாளர் அதற்கான முஸ்தீபுகளில் இறங்கியிருந்தார் . சிக்னல் போடுவதற்கு பத்து நொடிகள் இருக்கும் போதே வண்டியை எடுத்து விடவேண்டும் இல்லையேல் , ஒலி எழுப்பியே நம்மை ஒழித்துவிடுவார்கள் . கிட்டத்தட்ட அந்த நிலையில் தான் இருந்தேன் . பணியாளர் ஓங்கி அறைந்தார் சன்னலை . கண்ணை மூடி , கண நேர இங்கி பிங்கியின் முடிவில் ஜெயமோகனின் ஆயிரம் கால் மண்டபத்தினை தெரிவு செய்து நீட்டினேன் . நூலக அம்மையார் என்னை வெளிறிய முகத்துடன் வெளியேற்றினார் .

ஆறு வருடங்களில் வெவ்வேறு பத்திரிகைகளிலும் , இதழ்களிலும் ஜெமோ அவர்கள் எழுதிய சிறுகதைகளின் தொகுப்பு . 1999  ல் அகரம் பதிப்பகத்தாரால் வெளியிடப்பட்ட  புத்தகம் . 2017 , சனவரி முதல் தேதி , மிகச்சரியாக பன்னிரெண்டு மணிக்கு முகநூல் நிலைத் தகவலுடனும் , ஆண்டவன் கருணையால் , அவ்வளவு எளிதில் விரும்பிடாத நான்கு ஜீவன்களின் விருப்பக்குரியுடனும் முன்னுரையை தொடங்கினேன் . நம் புத்திக்கு இரண்டு பத்திக்கு மேல் தாக்குபிடிக்க முடியவில்லை.

வேலைக்கு சேர்ந்த புதிதில் எப்பாடுபட்டாவது ஆங்கிலதில் புலவராகிவிடவேண்டும் என்ற சபத வெறியில் ஆங்கில இந்து பத்திரிக்கை வாங்கி , அதுவும் சொந்தக் காசில் வாங்கி பத்தி பத்தியாக பாத்தி கட்டிய நினைவுகள் வந்து போயின . ஒரு பத்தி வாசித்து அர்த்தம் விளங்குவதற்குள் பத்து பதினைந்து முறை அகராதியை புரட்டிப் பார்த்து ஓய்ந்த நாட்கள் அவை . இப்போது புத்தகத்தை வேலைக்காகாது என்று மூடி வைக்கவும் மனமில்லை . புத்தாண்டின் ஆரம்பமே அரைகுறையாக இருப்பது அபசகுனமல்லவோ...!

அர்த்தம் , அகராதியை எல்லாம் ஓரங்கட்டி விட்டு கதைக்குள் நுழைந்தேன் . முதல் கதை புத்தகத்தின் தலைப்பை தாங்கி வரும் “ஆயிரங்கால் மண்டபம்” . செண்பகக் குழல் வாய் மொழி என்னும் சிறுமியின் பார்வையில் சித்திக்குட்டி என்ற பெண்ணின் மீது நடத்தப்படும் மண வன்முறையை சொல்லிச் செல்கிறது . மனிதர்களின் மனம் எவ்வளவு கல்லாக இருக்கின்றது என்பதை உணர்த்தும் விதமாக சித்திக்குட்டி கற்சிலையாகிவிட்டார் என்று புரிந்து கொண்டேன் . கதையின் முதல் பத்தியில் வரும் மண்டப விவரணையில் மனம் லயித்து ஒரு சுகானுபவத்தை உணர முடிகின்றது .

அடுத்ததாக , “தேவகி சித்தியின் டைரி” . கட்டிப்பெட்டித் தனமான ஒரு குடும்பத்தில் திருமணமாகியிருக்கும், சுயமாக சிந்திக்கும் , சம்பாதிக்கும் திறமையுள்ள ஒரு பெண்னின் சுய விருப்பு, வெறுப்புகள் எவ்வாறு அவர் வாழ்வை புரட்டிப்போடுகின்றன என்பதினை விவரித்திருக்கிறார். மேற்படி கதையை வாசிக்கும் போது சமீபத்தில் படித்த ஒரு நிலைத்தகவல் நினைவிற்கு வந்தது .

ஓர் அவசர வேலை நிமித்தம் தனது வயோதிக தாயாரை தொடர் வண்டியில் வழியனுப்பச் செல்லும்  ஒரு மகன் மற்றும்  தாய்க்கு இடையேயான உரையாடல் அது . முன்னேற்படில்லாத பயணம் என்பதினால் தாயை , பெண்கள் பெட்டியில் ஏற்றி விட முயற்சிக்கிறார் மகன் . தாய், வேண்டாமென மறுத்து பொது பெட்டியிலேயே ஏற்றி விடச் சொல்கிறார். காரணம் கேட்ட மகனிடம் பின்வருமாறு கூறுகிறார் .

எவளும் எடம் தரமாட்டாளுகப்பா ....!

அடுத்து “ஒன்றுமில்லை” கதை . எளிதில் விளங்கக்கூடிய , நடைமுறைத் தமிழில் உள்ள ஒரு சிறு கதை . அதீத நம்பிக்கை வார்த்தைகள் தாம் சமயங்களில் அச்சத்தை அதிகப்படுத்துகின்றன என்ற பொருள் படும் கதை . 

சாதரணமான கருதிய ஒன்று எப்படி அசாதரணமாக மாறுகின்றது என்பதினை கருவாகக் கொண்ட மருத்துவம் சார்ந்த புனைவு. அதில் இப்படி ஒரு வரி வருகிறது , அனேகமாக எலோருக்கும் இந்த வரிகள் வாய்த்திருக்கும் அல்லது வாய்க்க விரும்பியிருப்போம்.

“வலியில்லாத , மரண பயமில்லாத , நோயாளியாக இருப்பது போல ஆனந்தமான விஷயம் இன்னொன்று இல்லை . கவனம் , பிரியம், ஆதரவு ஆகியவற்றுக்குப் பாத்திரமாக அதைவிடச் சிறந்த சந்தர்ப்பம் வேறு இல்லை .”

அடுத்தது , “வெள்ளம்” . கனவுக்குள் கனவு போல ஒரு கதை என்று வாசித்து முடித்ததும் நானாக முடிவு செய்துகொண்டேன் . வாசிக்க ஆரம்பித்த சில நிமிடங்களிலேயே மூச்சு திணற ஆரம்பித்துவிட்டது . வெள்ளத்தில் சிக்கியிருந்தால் கூட இந்த அளவிற்கு மூச்சடைத்திருக்குமா என்பது சந்தேகமே . ஏ.டி.எம். வரிசையைப் போல வாக்கியங்கள் நீண்டு கொண்டே போவது அயற்சியை அதிகரிக்கின்றது . ஒரு வழியாக வாசித்து முடித்த போது சுழலில் சிக்கி மீண்ட அனுபவம் . சர்வ நிச்சயமா எனக்கு புரியவில்லை இருந்தாலும் வாசித்து முடித்தேன். ஒரு வேளை பிறிதொரு நாள் , மீள் வாசிப்புக்கு உட்படுத்தும்போது நம் வாசிப்புத் தரத்தினை புரிந்து கொள்வதற்கு ஏதுவாக இருக்கும் என்ற நம்பிக்கையில்.

இன்னும் நாலைந்து கதைகள் பாக்கியிருக்கின்றன அது அடுத்த பதிவில் .


என்றென்றும் புன்னகையுடன் ☺
ஜீவன் சுப்பு .