Jan 22, 2019

பேசாத வார்த்தைகள் - 1 - 220119







வேலை நிமித்தம் வெளி மாநிலங்களில் தங்கியிருக்கும் தமிழர்களிடம் பேசியிருக்கிறீர்களா...!?? அவர்கள் சொல்லும் பொதுவான ஒன்று...எவ்வளவு வசதி, வாய்ப்பு இருந்தாலும் நம்மூரு போல வராது. குறிப்பாக வடகிழக்கு மாநிலங்களில் வசிப்பவர்கள் , இன்னும் ஒரு படி மேலே போய் , தமிழ்நாடு ஒரு சொர்க்கம் என்பார்கள். என்னாது சொர்க்கமா என்று கேட்கும் நமக்கு நகைப்பாக இருக்கும். ஆனால், ஒரு நாலு நாள் வடகிழக்கு மாநிலங்களில் போய் தங்கி இருந்து வந்தால் சூடம் ஏற்றி சத்தியம் செய்வோம், தமிழ்நாடு சொர்க்கம் தான் என்று.

ஏன்...!!? நிறைய இருக்கின்றது. மருத்துவம் , கல்வி, வேலைவாய்ப்பு, உணவு, சகிப்புத்தன்மை, பாதுகாப்பு , சீரான தட்பவெப்பநிலை இப்படி அடுக்கிக்கொண்டே போகலாம். அலுவலக வேலை நிமித்தம் கடந்த ஜூன் மாதம் , ஒரு வார பயணமாக பஞ்சாப் சென்று வந்தேன். காலை 5 மணி முதல் இரவு எட்டு மணி வரை வெயில் வீசும் நீண்ட பகல். வெயில்ன்னா 47 டிகிரி. கிட்டத்தட்ட எண்ணெய்ச் சட்டிக்குள் இருப்பது போல். என்னங்க இவ்ளோ வெயிலாக இருக்கிறது என்றால், நீங்கள் வெயில் காலத்தில் வந்திருந்தால் என்ன சொல்லுவீர்கள் என்று கேட்டு சிரிக்கிறார் பஞ்சாபி. ஆம்..!! ஐம்பது டிகிரியை தாண்டும் வெயிலும் , மைனஸில் அடிக்கும் குளிரும் அங்கு சர்வசாதாரணம். ஏப்ரல் மேயில் போனால் கருகிப்போய்விடுவோம். நவம்பர், டிசம்பரில் போனால் உறைந்துபோய் விடுவோம்.

சீரான தட்பவெப்பநிலை தமிநாட்டின் தனிச்சிறப்புகளில் ஒன்று. அதீத வெயிலோ, மழையோ, குளிரோ எதுவுமில்லை. எல்லாமே safe zoneக்குள்ளாகவே இருக்கும். முப்பது வருடங்களுக்கு முன்பு மீனவர்களுக்கு கூட வானிலை அறிக்கை அவசியமானதாக இருந்ததில்லை. 2000க்கு பிறகு வானிலை அறிக்கை பார்த்து கடலுக்கு போவது அத்தியாவசியமானது. அடுத்தடுத்த வருடங்களில் கடலோர மாவட்டங்கள், ஆற்றுக் கரையோர மாவட்டங்கள் எல்லாம் மழைக்காலங்களில் வானிலை அறிக்கை பார்க்கவேண்டிய கட்டாயத்திற்குள்ளானது. இப்பொழுது தண்ணியில்லா காட்டில் இருப்பவர்கள் கூட வானிலை அறிக்கை பார்க்கவேண்டிய அவல நிலையில் இருக்கிறோம். மழைக்காலங்களில் இப்படியென்றால் கோடைகாலத்தில் ஏழு எட்டு வருடங்களாக வெயிலும் காட்டு காட்டென்று காட்டிக்கொண்டிருக்கிறது. பெரியவர்கள், குழந்தைகள் எல்லாம் வெயில் தாங்காமல் சுருண்டு, துவண்டுவிடுகிறார்கள். சென்னை, வேலூர் போன்ற ஊர்களில் ஏ.சி இல்லாமல் இருக்கவே முடியாது என்கிற நிலை.

இந்த climate disasterல் புது வரவு குளிர். இரண்டு வருடங்களாக வதைத்துக்கொண்டு இருக்கிறது கடுங்குளிர். எம்மைபோன்ற வெப்ப ரத்தப்பிராணிகளுக்கு இது கொடுங்குளிர். தனிப்பட்ட முறையில் சாப்பாடு, தூக்கம் இதெற்கெல்லாம் தரைதான் சவுகர்யம் எனக்கு. இந்த கட்டில், மெத்தை, டைனிங் டேபிள் இதல்லாம் அசவுகர்யம். வெயில் காலத்தில் மெல்லிய பெட்சீட், மழைக்காலத்தில் கூடவே ஒரு பாய் இதுதான் பள்ளியறை கவசங்கள். போனவருட குளிருக்கு கம்பளி தேவைப்பட்டது. இந்த வருடம் தினம்தினம், தினுசு தினுஷாக முயற்சித்துக்கொண்டிருக்கிறேன். அறை ஜன்னலுக்கு ஒரு கம்பளி, தரையில் ஐந்தெடுக்கு விரிப்பு. முதலில் நியூஸ் பேப்பர், அடுத்து காரட்டன் பாக்ஸ் அதைத்தொடர்ந்து பாய், கம்பளி, பெட்சீட் . இதற்கும் மேல் ஸ்வெட்டர் போட்ட ஞான் , எனக்கும் மேலாக தடித்த போர்வை. இப்படியிருந்தும் நான்கு மணிக்கு நடுங்க ஆரம்பிக்கிறது உடல். நமக்குத்தான் வயசாயிடுச்சோ என்று நினைத்து , சமவயது சகாக்கள் சிலரிடம் விசாரித்தேன் , எல்லோருக்குமே இது கடுங்குளிராகத்தானிருக்கிறது. மார்கழிதான் முடிஞ்சுருச்சே இனியும் ஏன்யா  குளிராண்டவர் ஓவர் டைம் பார்க்குறார்ன்னுக்கேட்டா தைல தல நடுங்கும் ; தரையும் குளிரும்  , மாசில மரம் நடுங்கும் , மச்சும் குளிருங்குறாங்க . எனக்கு கொலநடுங்குது...!!!

குளோபல் வார்மிங்க் தான் காரணமா...!!? இல்லை வேறதுவுமா என்று தெரியவில்லை. ஆனால், தமிழ்நாட்டு தட்பவெப்பநிலை இப்படி சீர்குலைந்து சின்னாபின்னமாகி போய்க்கொண்டிருப்பது உள்ளபடியே அதிக வருத்தம் தருவதாக உள்ளது. அனேகமாக அடுத்தது மணற் காற்றாகத்தானிருக்கும். கெட் ரெடி மக்காஸ்.

@@@@@@@@@@@@@@@@@@@@@@@@@@@@@@@@@@@@@@@@@@@@
"வாங்க ஏழைகளே" என்ற நெல்சன் சேவியரின் இரண்டு வார்த்தை ஸ்டேட்டஸ் ஒன்றுக்கு வண்டை வண்டையாக வசை பாடியிருந்தார்கள் நூற்றுக்கணக்கானோர். அதையொட்டிய இன்னும் சில நண்பர்களின் போஸ்டும் காணக்கிடைத்தது. ஆனால் தெளிவாக விஷயம் என்னவென்று விளங்கவில்லை. பத்திரிக்கை வாசித்து அறிந்துகொண்டேன்.

உயர்சாதி ஏழைகளுக்கென்று பத்து சதவீத இட ஒதுக்கீட்டிற்கான மசோதாவை மத்திய அரசு நிறைவேற்றியிருக்கிறது. அதையொட்டிய கருத்து பகிர்வுதான் துர் நாற்றம் வரக்கூடிய அளவிற்க்கு முற்றியிருந்தது.வெற்றிகரமான தோல்வி மாதிரி , உயர்சாதி ஏழைகள்ன்ற பதமே நகை முரணாக தோன்றும். ஆனால் அப்படி ஒரு கூட்டம் இருந்தது, இருக்கிறது. இருக்கும். நான்கூட அந்த கூட்டத்தை சேர்ந்தவன்தான். உயர்சாதி ஏழைகளுக்கான இடஒதுக்கீட்டை நான் வரவேற்கிறேன். ஆனால் அதற்கு கொடுக்கப்பட்டிருக்கும் தகுதிபட்டியலை எதிர்க்கிறேன் . இவர்கள் சொல்லியிருக்கிற தகுதிகளை வைத்துப்பார்த்தால் இந்த ஜென்மம் முழுக்க நான் உயர்சாதி ஏழையாகத்தான் இருப்பேன் போல. இது ஏதோ ஓட்டரசியலுக்காக கொண்டுவரப்பட்ட மசோதாதான் என்று எண்ணத்தோன்றுகிறது

ஏன் வரவேற்கிறேன்.!?

பிறப்பால் உயர்சாதி. வாழ்ந்து கெட்ட குடும்பத்தின் வாரிசு. பிறந்ததில் இருந்து 22 வயது வரை வற்றாத வறுமை . ரேஷனில் அரிசி வாங்கி , கருவேலங் குச்சி பொறக்கி கரியடுப்பில் சமைத்து மதியத்திற்கு வேண்டுமென்று காலையில் அரைவயிரும், இரவிற்கு வேண்டுமென்று மதியம் அரைவயிரும், இரவில் அரைவயிருமாக , அரைவயிற்றுக் கஞ்சி குடித்து ஆளாக்கினார் அம்மா. பத்தாம் வகுப்பு முடித்தவுடன் , டிப்ளமோ படித்தால் சீக்கிரம் வேலைக்குபோய் முழு வயித்துக்கும் சாப்பிடலாம் என்றே பாலிடெக்னிக்கில் சேர்ந்தேன்.

பத்தாம் வகுப்பில் 416 மதிப்பெண்கள். அந்த வருடம் பார்த்து டிப்ளமோவிற்கும் கவுன்சிலிங் ஆரம்பித்தார்கள். அடகு வைத்த அம்மாவின் அரைபவுன் தோடு மூலம் கிடைத்த பணத்தைக்கொண்டு, மாமாவின் துணையோடு அண்ணா பல்கலைக்கழகம் போய்சேர்ந்தேன். காரைக்குடி அழகப்பாவில் சீட்டு கிடைத்தால் , தெரிந்த ஊர் , 50, 100 என்று சல்லிசான வாடகையில் வீடு பிடித்து அம்மாவும் உடன் வந்துவிடலாம். மாதா மாதம் விடுதிகட்டணம் கட்டவேண்டிய சுமை இல்லை என்று எண்ணி போயிருந்தோம். 84 சதவீத மதிப்பெண்கள் எடுத்தும் அழகப்பாவில் சீட் கிடைக்கவில்லை. காரணம் OC. அன்றைய தேதியில் எங்கள் குடும்ப ஆண்டு வருமானம் ஏழு, எட்டு ஆயிரம். அதுவும் நிரந்தரமில்லை. அறந்தாங்கி பாலிடெக்னிக்கில் இலவச இடம் கிடைத்தது. ஆனால் பிரச்சனை விடுதிகட்டணம். மாதா மாதம் ரூபாய் 650 கட்டியாக வேண்டும்.

செய்வதறியாமல் திகைத்து நின்றேன். எங்களது பொருளாதார நிலையறிந்த அலுவலகர் , நீங்க 500 , 1000 செலவு பண்ணியிருந்தா BC ன்னு மாத்தியிருக்கலாமே என்றார் . எனக்கு அம்மாமேல் கோபமாக வந்தது. அம்மாவுக்கு அப்பாமேல் கோவம் வந்தது. கடைசியில் மூன்று வருடத்திற்கும், மாதா மாதம் சரியான தேதியில் விடுத்திகட்டணம் கட்டாததற்கு அபராதம் விதிக்கப்படும் என்றும், விடுதியை விட்டு நீக்கப்படும் என்று எச்சரிக்கை கடிதம்தான் வந்தது.

தெரிந்தவர், தெரியாதவர், என்று பலரின் உதவியோடும் , அம்மாவின் கல்யாணத்திற்கு சீர்வரிசையாக கொடுத்த அண்டா, குண்டான், தாலி ,தோடு என்று அடகு வைத்தது மூலமும் படித்து முடித்தேன். பத்துபைசா ஸ்காலர்ஷிப் இல்லை. கேட்ட கல்லூரியில் கேட்ட இடம் கிடைக்கவில்லை. படிப்பின் மீதே வெறுப்பு. உயர் சாதியில் ஏழையாய் பிறப்பதெல்லாம் பெருந்துயரம். உறவோடும் ஒட்ட முடியாது. ஊரோடும் ஒன்ற முடியாது.

விடுதிக்கட்டணத்திற்காகவும், தேர்வு கட்டணத்திற்காகவும்  வாங்கிய 20 ஆயிரம் ரூபாய் கடனை அடைப்பதற்கு மூன்று வருடங்கள் முழுமையாக தேவைப்பட்டது எனக்கு. வேலைக்கு சேர்ந்து ஐந்து வருடங்கள் கழித்து , இருபத்தி ஐந்தாவது வயதில் தான் எங்கள் 400 சதுர அடி ஓட்டு வீட்டிற்கு மின்சார இணைப்பே கொடுக்க முடிந்தது. இப்பொழுது மெல்ல எழுந்தாயிற்று. ஏதோ 2 சென்ட் இடமும், நாலைந்து பவுன் நகையும் கூடவே ஒற்றைப்பிள்ளையாய் பிறந்ததாலும் இந்த அளவிற்கு படித்து மேலே வர முடிந்தது. இதுவும் இல்லாத உயர்சாதி ஏழைகள் நிலைமை ரெம்ப மோசம்.


ஏன் எதிர்க்கிறேன்...!!?

இன்றைய தேதியில் ஜாதிச்சான்றிதழையே எளிதாக  corrupt செய்து கரெக்ட் செய்ய முடிகிறது. வருமான வரி சான்றிதழ் எல்லாம் ஒரு விஷயமே இல்லை. இரண்டாவது,  8 லட்ச ரூபாய் ஆண்டு வருமானம், ஐந்து ஏக்கர் நிலமெல்லாம் இருந்தால் அரசாங்கத்திடமிருந்து குண்டுமணி அளவிற்கு கூட மானியமோ, சலுகையோ தேவையில்லை. அரசு கூறியிருக்கும் இரண்டு தகுதியும் எனக்கு இருக்கிறது ஆனாலும் இட ஒதுக்கீடு இல்லாமலே என்னால் என் குடும்பத்தை என் குழந்தையை சிறப்பாக படிக்க வைக்க வாழ வைக்க இயலும். எல்லாருமே விட்டுக்கொடுக்க மாட்டார்கள். உதாரணத்திற்கு 8 லட்ச ரூபாய் வருமானமுள்ள ஒருவர் சட்டத்தில் இருக்கும் ஓட்டையை பயன்படுத்தி சலுகையை அனுபவிப்பார்கள். என்பாதாயிரம் ரூபாய் கூட வருமானம் இல்லாதவர்கள் இல்லாமலே போவார்கள். இதற்கு அதிகபட்ச வாய்ப்பிருக்கிறது.

இரண்டரை லட்சம் ஆண்டு வருமானம் இருந்தாலே வருமான வரி வரம்பிற்குள் வரும் ஒருவர் எப்படி உயர்சாதி ஏழை வரம்பிற்குள்!!?? ஒரு லட்சத்திற்கும் குறைவான வருமானம், ஒரு சென்ட் இடத்திற்கும் குறைவான நிலம் அல்லது , வீடு வைத்திருப்பவர்கள் மட்டுமே தகுதியானவர்கள் என்று அறிவித்தால் 50 சதவிகிதமாவது உபயோகமாக இருக்கும். ஆனால் அதிலும் தில்லு முல்லு செய்பவர்கள் இருக்கத்தான் செய்வார்கள். இட ஒதுக்கீடுதான் வேண்டுமென்று இல்லை, பொருளாதார உதவி என்ற வகையிலாவது அவசியம் உதவவேண்டும். ஏனெனில் உயர்சாதியில் ஏழையாய் பிறப்பது அந்த குழந்தையின் தவறல்லவே.


என்றென்றும் புன்னகையுடன்
ஜீவன்சுப்பு.

Oct 5, 2018

பேசாத வார்த்தைகள் : 07092018

பேசாத வார்த்தைகள் : 07092018






ஆந்திராவில் மையம் கொண்டு , தமிழகத்தில் கரை ஒதுங்கிக்கொண்டிருக்கும் “இம்கேம் இம்கேம்” புயலை இரண்டு நாட்களாக பார்த்தும் , கேட்டும் கொண்டிருக்கிறேன் . “கீத கோவிந்தம்” என்ற தெலுங்கு படத்திற்காக கோபி சுந்தர் இசைத்திருக்கும் பாடல் இது . ஐம்பது மில்லியனை கடந்து நூறை  துரத்திக்கொண்டிருக்கிறது யூ டியூப் ஹிட்ஸ் . தமிழ் வெர்ஷன் வேறு வந்திருக்கிறது. சமயங்களில் ஓரளவு சூப்பர் , சூப்பர் டூப்பர் ஹிட் ஆவதும், சூப்பர் டூப்பராக வரவேண்டியது அட்டர் பிளாப் ஆவதும் சகஜம். நம்மூரில் கூட கொலவெறியோடு ரெம்ப பேரு திரிந்தார்கள். சரி போகட்டும் ...! பாடலின் ஒரு பகுதியை சுட்டிக்காட்டி இந்த இசை முப்பத்தாறு வருசத்துக்கு முன்பாக இளையராஜா கோழி கூவுது படத்திற்காக போட்டது என்றும் ( பூவே இளைய பூவே ) அதிலிருந்து சுந்தர் சுட்டிருக்கார் என்றும் ஒரு யூ டியூப் வீடியோ சொல்கிறது. ஏழுமலையானுக்கே வெளிச்சம். பாடலின் ஆரம்ப சில வினாடிகள் எனக்கு “கொஞ்ச நாள் பொறு தலைவா” பாடலை நினைவுபடுத்தியது. 

பாடலுக்கு சுவராஸ்யம் சேர்ப்பது , கோரஸ் பாடும் ஜதி , அதற்கு இணையாக அவயங்களை அழகாக அசைக்கும் அந்த பரத நாட்டிய மங்கைகள். எல்லாவற்றிக்கும் மேலாக சித்ஸ்ரீராம் . லவ் யூ மேன். பாடலை கேட்கும்போதெல்லாம் சித் ஸ்ரீராம் கண் முன்னே வந்து போகிறார் . தமிழ் சினிமாவைப்போல் ஒரேயடியாக உச்சஸ்தாயியில் கதற விடவோ இல்லை ஹஸ்கி வாய்சில் கலங்க விடவோ செய்யாமல் , இயல்பான துள்ளலுடன்  பாடவிட்டிருக்கிறார் சுந்தர். கூடவே நிறைய வாய்ஸ் வேரியேஷனுக்கு இடம் கொடுத்திருக்கிறார். சித்தின் கெரியரில் கெத்தான பாடல் இது . கதாநாயகன் விஜய் தேவரகொண்டாவை  கண்டு பெண்கள் பித்தாக அலைவதாகச் சொல்கிறார்கள். போலவே மேற்படி பாடலில் வரும் ஹீரோயினுக்கு பாசறை எல்லாம் ஏற்பாடாகியிருப்பதாக அறிகிறேன். துயரம். ஒரு காட்சியில் கீரோயின் சிரிக்கிறார் , உவ்வே...ஹேன்ட் பேக்கை அன்ஷிப் பண்ணுவது போல உள்ளது . பிறிதொரு காட்சியில் ஹீரோவைபோல இமிடேட் செய்து நம்மை இரிடேட் செய்கிறார். இதெற்கெல்லாம் பரிகாரமாக சிலவினாடிகள் வரும் ஒரு கருப்பு வெள்ளை காவியத்தை பாடலில் இணைத்திருக்கிறார் இயக்குனர். அபாய வளைவுகளுடன் , அதைவிட அபாயகரமான போஸில் ஹீரோயின் தலை துவட்டும் காட்சியில் இருந்து அதற்கடுத்து வரும் காட்சிகள் பாடலுக்கு வேறொரு mood கொடுக்கிறது. இயக்குனர் “ஹாட்,ஹாட்டர்,ஹாட்டஸ்ட்” நிகழ்ச்சியின் விசிறியாக இருப்பார் என்று சந்தேகிக்கிறேன்.


@@@@@@@@@@@@@@@@@@@@@@@@@@@@@@@@@@@@@@@@@@@@

பிளாஸ்டிக் ஒழிப்பு தொடர்பாக, தாம் கொண்ட கொள்கையில் அரசு உறுதியாக இருக்குமா இல்லை வழக்கம்போல இம்முறையும் பாலீதின் பைகளைப் போலவே  காற்றில் பறக்க விட்டுவிடுமா என்று தெரியவில்லை. அம்பானி அன்கோ ஆட்டைய கலைக்காமலிருந்தால் சரி. திருப்பூரில் பாலிதீன் பைகள் உபயோகப்படுத்துவது ஓரளவிற்கு மட்டுப்பட்டுள்ளது.  மாநகராட்சி கட்டுப்பாட்டை மீறி பாலீதீன் உபயோகிக்கும் கடைக்காரர்களுக்கு பத்தாயிரம் வரை உடனடி அபராதமாக விதிக்கிறார்களாம். பாத்திரம் எடுத்துட்டு வாங்க தம்பி என்று கறிக்கடை பாயும், கட்டப்பை எடுத்துட்டு வாங்க சார் என்று காய்கறிக்கடை அண்ணாச்சியும் சொல்ல ஆரம்பித்திருக்கிறார்கள். பாலிதீன் பைகளை உபயோகப்படுத்தும் பொதுமக்களிடமும் குற்றவுணர்ச்சியை காண முடிகிறது. ஆனாலும் முற்றாக தவிர்த்ததுபோல தெரியவில்லை . ஆணையை அரசு கடுமையாக அமல்படுத்தட்டும் பார்க்கலாம் என்றும் , அவர்கள் கொடுப்பதை நிறுத்தட்டும் ; நாங்கள் வாங்குவதை நிறுத்துகிறோம் என்ற அலட்சியமுமே மேலிடுகிறது . கடந்த பதினைந்து வருடங்களாகத்தான் பாலிதீன் உபயோகம் இப்படி அதிகரித்திருக்கிறது. ஒரு தலைமுறைக்குள்ளாகவே இப்படி அசுரத்தனமாக வளர்ந்து நிற்கும் பாலீதீனை இனியும் தொடர்வது நமக்கும் நல்லதல்ல நம் சந்ததியினருக்கும் உகந்தது அல்ல. கடந்த இரண்டு வாரங்களாக இறைச்சி வாங்குவதற்கு பாத்திரமும், காய்கறி வாங்க கட்டப்பையையும் தூக்க ஆரம்பித்து விட்டேன் .
@@@@@@@@@@@@@@@@@@@@@@@@@@@@@@@@@@@@@@@@@@

டாட்டா நிறுவனம் இண்டிகா கார் உற்பத்தியை நிறுத்திவிட்டார்களாம். மிகச்சரியாக இருபது வருடங்களுக்கு “T போர்டு மார்க்கெட்டில் கொடி கட்டி பறந்த வாகனம் இண்டிகா. வாடகைக்கார் என்றால் அம்பாசடர் காருக்கு அடுத்ததாக அனைவராலும் அறியப்பட்டது . பொதுவாக டாடா வாகனங்கள் டீ போர்டுக்கென்றது என்றே இன்றளவும் நினைவுகூறப்படுகின்றது. எப்படி பதிந்தது இந்த எண்ணம் என்று தெரியவில்லை. இண்டிகா காரை தனி நபர் உபயோகத்திற்காக வைத்திருந்த ஒருவரைக்கூட என் சுற்றத்தில் காண முடியவில்லை. ஏன் இப்படி ...!? பராமரிப்பு செலவு , மைலேஜ் காரணம் என்றால் ஏன் மாருதி ஆல்டோவை ,மாருதி 800ஐ டீ போர்டில் காணமுடியவில்லை...!?சமீப காலமாக டாடா குழுமத்திலிருந்து அடுத்தடுத்து ஹேட்ச் பேக் கார்கள் வந்துகொண்டிருக்கின்றன. பார்க்கலாம் மக்கள் டாட்டா சொல்கிறார்களா இல்லை வெல்கம் சொல்கிறார்களா என்று .

@@@@@@@@@@@@@@@@@@@@@@@@@@@@@@@@@@@@@@@@@@@@.

புதிய அலுவலகத்தில் மலையாள நண்பர் ஒருவர் அமைந்திருக்கிறார். அவசரப்பட்டு குமையவேண்டாம் , அவர் ஆண் நண்பர். அகன்ற மார்பும், அடர்ந்த தாடியும், ஆறடி உயரமும் உள்ள ஆஜானுபாகுவான ஆண் சிங்கம். தோற்றம் கரடுமுரடாக இருப்பினும் , இளகிய மனம் கொண்டவர். கடந்த மாத நேர்பேச்சில் சினிமாக்களை பற்றி சம்சாரித்தபோது. கைவசம் ஏதேனும் மலையாள சினிமாக்கள் இருந்தால் பகிரவும் என்ற வேண்டுகோளுக்கிணங்கி ஏழெட்டு படங்களை உடனடியாக ஷேரிட்டிருந்தார். அதிலிருந்து சப் டைட்டில் உள்ள படமாக பார்த்து , பார்த்துக்கொண்டிருக்கிறேன். முதல் படமாக “ஆதி” பார்த்தேன். மோகன்லாலின் தவப்புதல்வர் நடித்திருக்கிறார். திரிஷ்யம் பட இயக்குனரின் படைப்பு . ஆரம்ப காட்சிகளில் ஜூனியர் லாலின்  குரலும், உடல்மொழியும் திசைக்கொன்றாக கும்மியடிக்கிறது . பெங்களூருக்குள் நுழைந்தவுடன் படம் வேகமெடுக்க ஆரம்பிக்கிறது . கபடி விளையாடிக்கொண்டிருக்கும் விஜய் கட்டிடம் கட்டிடமாக தாண்டியதையே ஆவென்று வாயைப்பிளந்து பார்த்த நமக்கு , தாண்டோட்டம் என்ற தாவுதலையே விளையாட்டாக பயின்றிருக்கும் ஹீரோ பெங்களூருவை தாண்டுவதை யார் நீங்க , எப்படி தாண்டுறீங்க என்ற கேள்விகளுக்கு இடம்கொடுக்காமல் , எளிதாக ஏற்றுக்கொள்ள முடிகிறது .  கிளைமேக்ஸ் தமிழ்சினிமா போல இருந்தாலும் , படம் பார்க்கலாம் ரகம் . சம்பவம் எங்கே , எப்பொழுது , எப்படி நடந்தது என்று முன் கூட்டியே தெரிந்திருந்தாலும் சுவாரஸ்யமாக கொண்டு சென்றிருக்கிறார் இயக்குனர். வில்லன்களாக சித்தரிக்கப்பட்ட இருவருக்கும் கட்டுடல்.  சமகால மலையாள சினிமாவை ஒப்பிடும்போது இது சுமார் தான், ஆனாலும் நம்மூரில்  கலை வாரிசுகள் அறிமுகமான முதல் படத்தோடு ஒப்புநோக்கும்போது இப்படம் ஃபார் பெட்டர் .

என்றென்றும் புன்னகையுடன்
ஜீவன்சுப்பு.

Apr 10, 2018

பேசாத வார்த்தைகள் : 04-2018




தண்ணீர் தட்டுப்பாடு , தண்ணீர்ப் போர் வருவதெல்லாம் ஒருபுறம் இருக்கட்டும். இப்போதைய பிரச்னை தண்ணீர் கலப்படம். இரண்டு நாளுக்கு முன் வாட்சப்பில் வந்த ஒரு சலனப்படத்தில் , மினரல் வாட்டரில் கால்சியமே இல்லை , பாருங்கள் என்று குண்டு பல்பை வைத்து குண்டு போட்டார்கள். சமீபத்திய இந்து பத்திரிக்கையின் நடுப்பக்கத்திலும் , தலையங்கத்திலும் தண்ணீர்க் கலப்படத்தை பற்றி கவலைப்பட்டிருந்தார்கள். கண்ணுக்கு புலப்படாத ஆயிரக்கணக்கான பிளாஸ்டிக் துகள்கள் நாம் குடிக்கும் தண்ணீரில் கலந்திருப்பதாக ஆராய்ச்சியில் கண்டறிந்திருக்கிறார்களாம் . எந்த நம்பிக்கையில் குழந்தை , குட்டிகளை பெற்று வைத்திருக்கிறோம் என்று தெரியவில்லை. முன்பெல்லாம் மழை பெய்தால் , ரோட்டில் மண்ணும் , சகதியும் படிந்திருக்கும். ஆனால் இப்பொழுது பிளாஸ்டிக் கவர் தான் பறந்து , பரந்து படிந்திருக்கிறது. வரும் காலத்தில் பிளாஸ்டிக் மழையே பெய்தாலும் ஆச்சர்யப்படுவதற்கில்லை. கையை வீசிக்கொண்டு கடைகளுக்கு  செல்வதற்குப்பதில் , கட்டைப்பையை தூக்கிக்கொண்டு போனாலே போதும் நாட்டின் பாதி பாலிதீன்களை ஒழித்துவிடலாம். ஆனால் நம்முடைய அலட்சியமும் , சோம்பேறித்தனமும் எதிர்காலத்தை நிர்மூலமாக்கிக்கொண்டிருக்கிறது.

@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@
சூரியனார் ஃபுல் பாஃர்மிற்கு வந்துவிட்டார். அதிகாலையில் , பச்சைத்தண்ணீரில் குளித்துக்கொண்டிருக்கும்போதே வியர்த்து கொட்டுகிறது. நான்கு நாட்களுக்கு முன்பு ஒரு இரண்டுமணி நேரம் நண்பகலில் டூ வீலரில் சுற்றி வீட்டிற்கு வந்தேன் , அடுத்த நான்குமணி நேரத்திற்கு உலகமே சுற்றிவிட்டது. “ஹீட் ஸ்ட்ரோக்” என்கிற வார்த்தையை சர்வ சாதரணமாக கேட்கமுடிகிறது . அடுத்த இரண்டு , மூன்று மாதத்திற்கு சூதானமாக இருந்துகொள்ளவேண்டும் , இல்லையேல் பஸ்பம்தான். வெயிலுக்கு இதமாக இருக்குமே என்று இளநீர் குடித்தால் , அன்னிச்சை செயலாக கண் இளநீர்க்காரரின் கையை நோக்குகிறது. அருவி எஃபெக்ட். சரி சல்லிசாக கிடைக்கும் தர்பூசணியை சாப்பிடலாமென்றால் தர்பூசணியில் கெமிக்கல் , இன்ஜெக்சன் என்று சித்தமருத்துவர் சிவராமன் பீதியைக்கிளப்புகிறார். எல்லா பக்கமும் முட்டு சந்தாகவே இருந்தால் எங்கதான் போறது யுவர் ஆனர்...!!??
@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@
சார்லி மற்றுமொரு ஃபீல் குட் மலையாளப்படம். 






பேஃஸ்புக் குரூப்பில் சிலாகிக்கப்பட்டிருந்த சார்லியை பார்த்தேன் , பார்க்கிறேன் . பார்த்துக்கொண்டே இருக்கிறேன். நேற்றையைப் பற்றிய கவலையும், நாளையப் பற்றிய பயமும் இல்லாமல் அன்றைய, அப்போதைய நிமிடத்தை அனுபவிக்கும் தேசாந்தரி சார்லியாக துல்கர். முன்பின் தெரியாதவர்களுக்கு, தேவைப்படும் நேரத்தில் தக்க உதவிகளைச் செய்து சம்பந்தப்பட்டவர்களை சந்தோஷப்படுத்தி , சலனமில்லாமல் அடுத்தடுத்த இடங்களுக்கு நகர்ந்து கொண்டே இருக்கிறார் . துல்கருக்கு அந்தத் தாடி ஆப்டாக இல்லை . மற்றபடி மனுஷன் நடிப்பில் குறைவைக்கவில்லை. இந்த கதாபாத்திரத்தில் பஹத் நடித்திருந்தால் இன்னும் பெட்டரா இருந்திருக்குமே என்றொரு எண்ணம் வந்துபோனது. சமீபமாக பஹத் பித்து பிடித்தாட்டுகிறது. 

வேலை , வீடு , பேஃஸ்புக் , வாட்சப் என்று செட்யூல்டு வாழ்கையை வெறுத்து , புதிய மனிதர்களையும் , இடங்களையும்  கலையையும் தேடித்தேடி நகரும் டெஸ்ஸா என்ற கதாபாத்திரத்தில் பார்வதி. பார்வையாளனின் மொத்த பார்வையையும் ஒத்தை ஆளாக குத்தகைக்கு எடுத்திருக்கிறார் பாவை பார்வதி. என்ட மோளே என்னா நடிப்பும்மா ...! தடித்த பிரேம் கொண்ட மூக்குக்கண்ணாடி , பாதி வெட்டப்பட்டு காற்றில் கவிதை  வரையும்  கேசம் , ரிலாக்ஸ்டான ட்ரெஸ்சிங் , பெரிய சைஸ் மூக்குத்தி என்று  டெஸ்சாவின் அவுட்லுக் அட்டகாசமாக இருக்கிறது. கிட்டத்தட்ட அரை இன்ச் போல்டு சைசிற்கு இருக்கும் மூக்குத்தி மற்ற நடிகைகளுக்கு எந்த அளவிற்கு பொருந்தும் என்று தெரியவில்லை. சமீபத்தில் வந்த விக்ரம் வேதாவில் மாதவன் ஜோடியாக நடித்திருந்த ....ஸ்ரீநாத் “இருக்கு ஆனா இல்லை” என்பதுபோல  மெல்லியதாக மூக்குத்தி அணிந்திருப்பார்  அதைத்தவிர வேறெந்த நடிகையும் மூக்குத்தி அணிந்திருந்ததாக தெரியவில்லை. தர்ஷினிக்கு மூக்குத்தி அணிவிக்கவேண்டுமேன்று ஆசையுண்டு .அதற்கு முன்பாக காது குத்தவேண்டும்.

பிரதான கதாபாத்திரங்களின் சித்தரிப்பு , தமிழில் வெளிவந்த “180” ரூல்ஸ் கிடையாது என்ற படத்தினை நினைவுபடுத்துகிறது. சார்லி தங்கிச் சென்ற அறைக்கு குடிவரும் டெஸ்ஸா , காமிக்ஸ் போன்று வரையப்பட்ட ஒரு ஓவியத்தொகுப்பினை காண்கிறார். அந்த ஓவியம் ஒரு கதையைச் சொல்லி, பாதியோடு நிற்கிறது . கதையின் மீதியையும்,  சார்லியையும்  தேடி புறப்படும் டெஸ்ஷாவின் பயணமே மீதிப்படம். திருடன் , படகோட்டி, குஞ்சப்பன் , கனி என்று அனைத்து கதாபாத்திரங்களுமே கச்சிதம் . பத்ரோஸ் , குயின்மேரி எபிசோடு ஒரு துயரக் கவிதை .

ஓவியம் தொடர்பான காட்சிகள் வரும் போதெல்லாம் ஒலிக்கும் பின்னணி இசை பிரமாதம்.கோபி சுந்தரின் இசை கொடி கட்டிப் பறக்கிறது . மால்குடி சுபாவின் அமர்க்களமான குரலில் ஒலிக்கும் “அகலே யாரோ பாடும் பாடல்” கேட்பதற்கு ஆஹா...!!! .விஷூவல்ஸ் வாவ்.!!! சக்திஸ்ரீகோபாலனின் “புலரிகளோ” சுகம். மேற்படி பாடலின் ஆரம்பத்திலும் , இடையிடையேயும் ஒலிக்கும் இஸ்லாமிய சேர்ந்திசை கேட்பவர்களுக்கு புதிய அனுபவத்தினை வழங்குகிறது. ஸ்ரேயாகோஷலின் “புதுமழை” – ஜன்னலோர சாரல்.
 
துல்கரின் அறை , அந்த ஸ்கூட்டர் ஓவியம் , மரப்படகு , சோமபானம் விற்பனை நடக்கும் வீட்டின் வெளிப்புறம் என்று படத்தில் அட போடவைக்கும் அஃறிணைகள் அதிகதிகம். ஆர்ட் டைரக்டருக்கு பூச்செண்டல்ல ஆளுயர மாலையே கொடுக்கலாம். படம் எடுக்கப்பட இடங்களுக்கு போக வேண்டுமென்ற எண்ணத்தினை அநேகக் காட்சிகள் , பார்வையாளருக்கு அன்னிச்சையாக ஏற்படுத்துவது ஒளிப்பதிவிற்கு கிடைத்த மகத்தான வெற்றி.

செல்போன் சிம்மை உடைத்து விட்டு தோழியிடம் பழிப்புக் காட்டுவது , புலரிகளோ பாடலில் வரும் தலையாட்டி பொம்மையின் அசைவிற்கேற்ப ஆடுவது , பூரம் திருவிழாவில் துல்கரிடம் தான் டெஸ்ஸா இல்லை என்று சொல்லி , அவரின் ஏமாற்றத்தை ஓரக்கண்ணால் ரசிப்பது என்று பல காட்சிகளில் பரவசப்படுத்துகிறார் பார்வதி. டேக் ஆஃபின் சமீராவே இன்னும் நினைவுகளை விடு அகலவில்லை. கூடுதலாக இப்பொழுது டெஸ்சாவும். பார்வதியின் மேஜிக்கை அனுபவிப்பதற்காகவே இன்னுமொருமுறை படத்தை பார்க்கவேண்டும். குறிப்பாக கிளைமேக்ஸில் வரும் தமிழ் வசனங்களும் , பார்வதி , துல்கரின் முகபாவங்களும் பால்பாயச முந்திரி. 

சார்லியில் வரும் எந்தவொரு முதன்மைக்  கதாபாத்திரங்களோடும் உங்களைப் பொருத்திக்கொள்ள முடியாது . அப்படியான கதாபாத்திரங்களை உங்கள் வாழ்வில் சந்தித்திருப்பதற்கான சாத்தியமும் சொற்பமே. ஆனாலும் படம் உள்ளுக்குள் ஊடுருவுகிறது.

 என்றென்றும் புன்னகையுடன்
 ஜீவன்சுப்பு.