பேசாத வார்த்தைகள் ~ 08122019

பேசாத வார்த்தைகள் ~ 08122019

உணவகம் ~ சுப்பு மெஸ்.

முன்கூட்டிய திட்டமிடல் இல்லாத ஒரு கோவை பயணத்தில் , மதிய உணவிற்காக சுப்பு மெஸ் படியேறினேன். மேற்படி மெஸ்ஸை தெரிவு செய்ததற்கு மூன்று காரணம் .

முதல் காரணம் நான் சொல்லவேண்டிய அவசியமில்லை ; உங்களுக்கே தெரிந்திருக்கும் . ஆம் . அதேதான். நாமம்..!!! இரண்டாவது அமைவிடம். பேருந்து நிலையத்திற்கு வெகு சமீபம். மூன்றாவது அசைவ சாப்பாடு ருசியாக இருப்பது.  சுப்பு மெஸ் அளவிற்கு வேறெந்த உணவகத்திலும் நீங்கள் மகளிர் கூட்டத்தை காணவியலாது. குறிப்பாக யுவதிகள்.

எப்பொழுதும் போல அப்பொழுதும் சுப்பு மெஸ் ஜனத்திரளால் நிரம்பி வழிந்தது. பத்து நிமிடக் காத்திருப்பிற்கு பின் இருக்கை கிடைத்து , உபகாசரிடம் முழுச்சாப்பாடு கோரினேன். கூடவே வறுத்த மீன். தலைவாழை இலை போட்டு , ஒரு எவர்சில்வர் தட்டில் சடங்குப்பொருட்கள் போல குழிக்கிண்ணங்களில் கூட்டு, பொரியல் , மீன் மற்றும் ஆட்டுக் குழம்பு , தயிர் நிரப்பி கொண்டு வந்து வைத்தார்கள்.

உங்களுக்கு அதிர்ட்டம் இருந்தால் கறிக்குழம்புக் கிண்ணத்தில் ஒரு சிறு துண்டு கறி கிடைக்கலாம். அதிர்ட்டம் இருந்தாலும் இல்லாவிட்டாலும் மீன் மட்டும் கிட்டாது. இரண்டு குழம்புமே அளவான காரம். மீனை விட கறிக்குழம்பு சுவை. கூட்டு பொரியல் ஓகே ரகம். உள்ளங்கை அளவிற்கான மீன் துண்டு குறைவான மாசலா, எண்ணெய் தடவி வெங்காயம், எலுமிச்சை சகிதம் மிதமான சூட்டில் பரிமாறப்பட்டது. நடுவில் இருந்த முள்ளை தவிர எள்ளளவும் சேதாரமில்லை. ஒரு முழுச்சாப்படும் , மீன் துண்டும் 245 ரூபாயானது. 200க்குள் இருந்திருந்தால் தகும்.

@@@@@@@@@@@

பெண்கள் , பெண் குழந்தைகள் மீதான பாலியல் அத்துமீறல்களை கட்டுப்படுத்தும்விதமாக , இணையத்தில் குழந்தைகளை கொண்டு எடுக்கப்பட்ட ஆபாச படங்களை , பார்ப்பவர்களை பட்டியலிட்டிருக்கிறோம் என்றும் , சம்பந்தப்பட்டவர்களை விசாரித்து அறிவுரையும் தேவைப்பட்டால் தண்டனையும் வழங்குவோம் என்று காவல்துறை அறிவித்திருக்கிறது. ஒரு பெண் பிள்ளையை பெற்றவன் என்ற முறையில் வரவேற்கிறேன். அதே சமயம் சம்பத்தப்பட்ட சலனப்படங்களை எடுப்பவர்களை ; இணையத்தில் ஏற்றுபவர்களை தண்டித்தால் மிக்க மகிழ்வோம்.

மற்றபடி இன்றைய சூழலில் பார்ன் மூவி பார்ப்பதற்கோ , சமிஞ்கைகள் வாசிப்பதற்கோ பெரிதாக அலட்டிக்கொள்ள தேவையில்லை. வெப் சீரிஸ் , வெட்டிங் போட்டோகிராஃபி , கிண்டில் புத்தகங்களே போதுமானதாக இருக்கிறது. நீங்க நம்பவில்லையெனினும் அதுதான் நிஜம்.

@@@@@@@@@

புத்தகம் ~ அகிலாஷ் சூறாவளியின் 18 சிறுகதைகள்.

பிரபாகரின் சிபாரிசின் பேரில் பெருமுயற்சி எடுத்து அமேசான் கிண்டில் எல்லாம் டவுன்லோடி மேற்படி புத்தகத்தை இலவசக் கொள்முதல் செய்தேன். கிண்டிலை ஆண்ட்ராயிடிலும் வாசிக்கலாம் போல. எனக்கு கிண்டில் ஆண்ட்ராய்டில் புத்தகம் வாசிப்பது இதுதான் முதல்முறை.

பக்கத்திற்கு இருபது முதல் இருபத்தைந்து வரிகள். வரிக்கு நான்கு வார்த்தைகள் என்ற கட்டமைப்பில் இருக்கிறது. புத்தகம் போலவே பக்கத்தை புரட்டும் வசதிகூட உண்டு. வாசித்த பக்கங்களின் சதவீதம்,  வாசிக்க வேண்டிய பக்கங்களின் உத்தேச நேரத்தேவை எல்லாம் footnote ல் காணக்கிடைக்கிறது. பத்து நிமிடங்கள் சேர்ந்தாற்போல வாசித்தால் 20,30 பக்கங்களை எளிதில் கடந்துவிடலாம். நல்ல பெரிய எழுத்துரு ; அவ்வளவாக கண்களை உறுத்தாத பின்னணி என்று வாசிக்க சவுகர்யமாவே இருக்கிறது.

சரி புத்தகத்திற்குப் போவோம். மொத்தம் 18 சிறுகதைகள். அகிலாஷ் சூறாவளி என்கின்ற சுரேந்தர் என்பவர்தான் எழுதியிருக்கிறார். வழக்கமான சிறுகதை பாணியெல்லாம் இல்லாமல் ஒன்றுக்கொன்று வித்தியாசமாக இருக்கிறது. ஆங்கில வார்த்தைகளை English லேயே எழுதியிருப்பது சிறப்பு. புத்தகத்தின் பெருங்குறையாக நான் கருதுவது  "எலுதுபிலைகள்". ஜீரணிக்கவே முடியவில்லை.

கணிசமான கதைகளில் பயணமும், உரையாடலும் பிரதானமாக இருக்கிறது. சாதாரண கதைகளில் வரும் உரையாடல்களிலேயே இது யார் பேசுவது என்ற ஐயம் வாசிப்பவனுக்கு வரும். இவரது சிறுகதைகளோ அசாதாரணமான ரகத்தில் இருக்கிறது. போதாதற்கு முன்பின்னாக, அரூபமாக கதையை சொல்லிச் செல்கிறார். ஆரம்ப கட்டத்தில் இருக்கும் வாசகர்களுக்கு புரிந்து கொள்வது ரெம்பவே கடினம்.

ஒவ்வொரு சிறுகதையிலும் சில பத்திகள் அபாரமாக இருக்கின்றது.  ஓர் ஆரம்பம் , ஒரு பிரச்சனை அப்றம் சுபமாகவோ , சோகமாகவோ ஒரு முடிவு என்கின்ற வழக்கமான சட்டகத்திற்குள் அடக்கமுடியாத சிறுகதைகள். அதுவே பலம் அதுவே பலவீனமும்.

கொஞ்சம் பொறுமையா மீள் வாசிப்புக்கு உட்படுத்தி திருத்தி வெளியிட்டிருக்கலாம். ஒரு போட்டி வைத்து , காலக்கெடு வைத்து , கட்டுப்பாடுகள் வைத்து எழுதினால் இப்படித்தான் வரும் போல. ஆடல், பாடல், ஓவியம் எழுத்து போன்ற கலைகளுக்கெல்லாம் போட்டி வைப்பதை அனுமதிக்கவே கூடாது. தனியல்பாக எவ்வித கட்டுப்பாடுகளுமின்றி முகிழ்க்கவேண்டும் என்பதே என் அபிப்பிராயம்.

அப்றம் அ.சூ கொஞ்சம் இண்டெலெக்சுவல் பார்ட்டி போல. எனக்கு ஒத்துவரவில்லை. புத்தகம் நல்லால்லைன்னு சொல்லல ; எனக்கு பிடிக்கலைன்னு கூட சொல்லமாட்டேன். பிடிபடலன்னு வேணும்னா சொல்லலாம். கொஞ்சநாட்கள் கழித்து பொறுமையாக மீள்வாசிப்பிற்கு உட்படுத்தவேண்டும்.

"சிப்பிக்குள் இருக்கும் முத்தின்பால் ஆயிரம் கனவுகள் " அப்படின்னு ஒரு கவிதை அதற்கொரு விளக்கம் ஒரு கதையில் வருகிறது. எனக்கு பிடித்திருந்தது.

என்றென்றும் புன்னகையுடன்.,

ஜீவன் சுப்பு.

பேசாதவார்த்தைகள் ~ #011219 ~ உலர் | சுஷ்சுருதி உணவகம் |ந.வீ.பி | DRIVE | HACKERS .

பேசாதவார்த்தைகள் ~ #011219 ~ உலர் | சுஷ்சுருதி உணவகம் |ந.வீ.பி | DRIVE | HACKERS .

கடந்த வாரத்தில் 3 படங்களை மொபைலில் பார்த்தேன். முதலாவது பாண்டிராஜின் நம்ம வீட்டுப் பிள்ளை. திரளான நடிகர்களை வைத்துக்கொண்டு குடும்பம், உறவுகள் சார்ந்து படம் எடுப்பதில் பாண்டிராஜ் தேர்ந்த விற்பன்னராகிவிட்டார். நான்கைந்து கதாபாத்திரங்களை மட்டுமே வைத்துக்கொண்டு சுவராஸ்யமாக படம் பண்ணுவதில் உள்ள சவால்களுக்கு நிகரான சவால்கள் இதுபோன்ற படங்களிலும் உண்டு. இத்துனை கதாபாத்திரங்களை சிருஷ்டித்து, அவர்களுக்கு ரசனையான நாமகரணம் சூட்டி , தனித்த சுபாவம் கொடுத்து அதை சுவரஸ்யமாகவும் அதே சமயம் துறுத்தாமலும் காட்சிப்படுத்துவதென்பது பராட்டப்படவேண்டிய ஒன்று. சிவாவுக்கு மீண்டுமொருமுறை கைகொடுத்திருக்கிறார் பாண்டிராஜ். படம் எனக்குப் பிடித்திருந்தது.

இரண்டாவதாக Drive என்றொரு இந்திப்படத்தின் தமிழ் டப்பிங் பார்த்தேன். அஃபீசியலாக கொள்ளையடித்த பணத்தை புரெபஷனலாக கொள்ளையடிக்கிறார்கள். ஸ்ட்ரீட் ரேஷும் ; ஜனாதிபதி மாளிகையும் களம். இதெல்லாம் நம்புறமாதிரியா சார் இருக்குன்ற ரகத்தில் அநேகக் காட்சிகள் இருப்பினும் , பார்வைக்கு இடையூறில்லை . லீட் ரோல் செய்திருக்கும் இருவருமே நச். ஹீரோ ரோல் செய்திருப்பவர் கண்களிலேயே சிரிக்கிறார். மலையாளத்தில் பகத் போல இந்தியில் இவர் போல. இவர்களுக்கு இணையாக தமிழில் ஜீவா வந்திருக்கலாம். வரவில்லை ; ஒருவகையில் தப்பித்தோம். கதாநாயகி அலட்டலான பெர்ஷனாலிட்டி. அசால்ட்டாக அசரடிக்கிறார். லேடி சூப்பர் சுடாரெல்லாம் நாலு அடியல்ல நாற்பதடி பேக் போகவேண்டும். படம், பார்க்கலாம் ; பார்க்காமலும் இருக்கலாம் ரகம்.

மூன்றாவதகா Hackers என்றொரு ஹாலிவுட் படத்தின் தமிழ் டப்பிங் பார்த்தேன்.  அதிகாரத்திலும் பதவியிலும் இருக்கும் நபர்கள் , பொதுமக்களின் இணைய  ; தொலைபேசி உரையாடல்களை , கருத்துபரிமாற்றங்களை வேவு பார்க்கிறார்கள். இதனை உலகறியச்செய்யும் முயற்சியில் இறங்கும் எதிர்க்கட்சி தலைவரை காவு வாங்க தேதி குறித்திருக்கிறார்கள். மேற்படி திட்டத்தை எதேச்சையாக அறிந்து கொள்ளும் ஹேக்கர் பெண்ணொருவர் , மற்ற ஹேக்கர்கள் துணையுடன் அம்பலடுத்துகிறார். இடையே அப்பா மகள் பாசம் , அப்பாவின் சிஷ்யப் பிள்ளையாண்டனுடன் காதல் , லிப்லாக்கெல்லாம் உண்டு. ஆங்கிலப் படங்களை தமிழ் டப்பிங்கில் பார்ப்பது , சுப்ரபாதத்தை ஒலிக்கவிட்டு ;  ஒளியில் கிரிக்கெட்டைப் பார்ப்பதுபோல் உள்ளது. பார்க்காமலேயே இருந்திருக்கலாம். சிப் அளவிற்குக்கூட சுவராஸ்யமில்லை.

@@@@@@

மயிலன் சின்னப்பனின் உலர் சிறுகதை வாசித்தேன். அச்சில் வந்திருக்கும் அவரது மூன்றாவது சிறுகதை இது என்றெண்ணுகிறேன். அந்திமழை இதழில் வந்திருந்ததாக எழுதியிருந்தார். அந்திமழையெல்லாம் எலைட் ரக வாசிப்பாளர்கள் மட்டுமே வாங்கிக்கொண்டிருக்கும் மாத/வார இதழ் போல. எனது விருப்பத்தின் பேரில் கட்செவியில் pdf கோப்பை அனுப்பி வைத்திருந்தார். அபாரமான சிறுகதை. சற்றே பெரிய சிறுகதையும் கூட. அவரின் முதலிரண்டு சிறுகதைக்கும்  உலர்க்கும் இடையே பெரும்பாய்ச்சலை நிகழ்த்தியிருக்கிறார் விவரணைகளில். கொஞ்சம் சிக்கலான மனித அகம் சார்ந்த எண்ணங்களை, வெளிக்காட்டிக்கொள்ள விரும்பாத உள் மன விருப்பங்களை தஞ்சை வட்டார வழக்கில் , நுட்பமாகவும் எளிதாகவும் எழுத்தில் வடித்திருக்கிறார். வாழ்த்துக்கள் டாக்டர். முதுநிலை மருத்துவம் படித்துவிட்டு பரபரப்பான மருத்துவராக இயங்கிக்கொண்டே எழுதுவதும், எழுத்தில் பிராகசிப்பதும் அபூர்வம். நல்லதொரு வாசிப்பனுபவத்தை தந்ததற்கு மனம் நிரம்பிய நன்றிகள் ம.சி. உங்களின் மீதான எதிர்பார்ப்பு ஏகத்துக்கும் எகிறியிருக்கிறது.

@@@@@@@

கடந்த வாரத்தில் ஒரு வேலை நாளில் எதேச்சையா கண்ணில் பட்டது சுஷ்சுருதி இயற்கை உணவகம். திருப்பூர் டூ பல்லடம் சாலையில், பழைய பேருந்து நிலையத்திற்கு வெகு சமீபமாக உள்ளடங்கி இருக்கிறது. விசாலமான வாகன நிறுத்துமிடமே பாதி திருப்தியை தந்துவிடுகிறது. பொதுவாக இயற்கை உணவகம், பாரம்பரிய உணவகம் என்றால் , பெருவாரியானவர்களைப் போல் எனக்கும் ஒவ்வாமை உண்டு. பெரிதாக ஒன்றுமில்லை ; அது இதுவென்று சொல்லி மொத்தமாக ருசியை காலி செய்துவிடுவார்கள் என்பதுதான் காரணம். திருமண மண்டப பந்திபோல் இருக்கிறது உணவருந்துமிடம். அதேசமயம் சாம்பாரில் கை வைக்கும்போதே நமக்குப் பின்னால் வந்து அடுத்த பந்திக்கான ஆட்கள் நிற்கும் அவலமில்லை . போலவே சாப்பிடுவதற்கு முன்பே டோக்கன் வாங்கச் சொல்லும் அசிங்கம் இங்கில்லை என்பது உபரி ஆறுதலாக இருந்தது. 

தலை வாழை இலை போட்டு இந்துப்புடன் பரிமாற ஆரம்பிக்கிறார்கள். புடலைங்காய் பொரியல் அதீத மசாலாவினால் தன்னியல்பைத் தொலைத்திருந்தது. ருசியும் பிரமாதமாக ஒன்றுமில்லை. அடுத்தது பலாக்கீரை மசியல். வேகவைத்த பருப்புடன் நன்கு மசித்திருந்தார்கள். நல்ல சுவை. அடுத்தது முள்ளங்கி துவையல். வாழ்வில் முதன்முறையா கேள்விப்படுகிறேன். புளி சேர்த்து மைய்ய அரைத்திருந்தார்கள். மோர் சாதத்திற்கு தொட்டுக்கொள்ள அபாரமாக இருந்தது. இதுபோக மாங்காய் ஊறுகாய், பொரித்த அப்பளம். 

ஒற்றைத் தீட்டல் பொன்னி அரிசியில் வடிக்கப்பட்ட சாப்பாடு. பதமாகவும் இல்லாமல் ; குழைவாகவும் இல்லாமல் பக்குவமாக வடித்திருந்தார்கள். இளம் சிவப்பு வண்ணத்தில் கொஞ்சம் குருணையாக இருந்தது சாதம். ஆனால் நல்ல ருசி. கதம்ப சாம்பாரை பொன்னிக்குவியலில் ஊற்றிப் பிசைந்து ஒரு கவளம் எடுத்து வாயில்போட்டால் அடடா பிரமாதம். எங்கள் பகுதியில் பூசைச் சாம்பார் என்று சொல்லுவார்கள். பல காய்கள் போட்டு , உறைப்பு கொஞ்சம் தூக்கலாக இருக்கும் . சூடான சாதத்தில் ஊற்றி சாப்பிட அமிர்தமாய் இருக்கும். இரண்டு நாட்களுக்குக்கூட வைத்துச் சாப்பிடுவோம். இங்கே வழங்கப்பட கதம்ப சாம்பார் நல்ல சுவை. பெரும்பாலான உணவகங்களில் சாம்பாரில் போடப்பட்டிருக்கும் காய்கறிகள் நானும் ரவுடிதான் ரேஞ்சுக்கு மட்டுமே இருக்கும். இங்கே விதிவிலக்கு. காய்கள் ருசியாக இருந்தது , விரும்பி சாப்பிட்டேன். அடுத்தது பருப்பு ரசம். எல்லா இடத்திலும் போல் இங்கேயும் மிளகாய் பொடி போட்டு சாம்பாரின் ஒன்றுவிட்ட தங்கச்சியைப் போல சமைத்திருந்தார்கள். 

அடுத்து , புளிக்குழம்பு ஓகே ரகம். அல்சர் பிரச்னையிருப்பதினால் ஊறுகாய் போல தொட்டுக்கொண்டேன். நாட்டு மாட்டுப் பாலில் உண்டாக்கிய தயிர் ஒரு கிண்ணத்தில் கொடுத்திருந்தார்கள். தயிருக்கு தாவுவதற்கு முன்பாக ரவை, பாசிப்பருப்பு, பச்சரிசி கலவையில் இளம் சூட்டில் கொடுக்கப்பட்ட பாயாசத்தை இலையில் விட்டு ஒரு பிடி பிடித்தேன். 90ஸ், 2k கிட்ஸ்களெல்லாம் பாயாசத்தை கிண்ணத்தில் போட்டு ஸ்பூனில் சாப்பிடுகிறார்கள். அட்டகாசமான விஷுவல்ஸ் கொண்ட ஒரு திரைப்படத்தை ஸ்டாம்ப் சைஸ் ஸ்க்ரீன் கொண்ட மொபைலில் பார்ப்பதற்கு ஒப்பானது அது. நிறைவாக தயிருடன் மோர் விட்டு ஏப்பம் விட்டேன். சில இடங்களில் மோரில் பச்சை மிளகாய், இஞ்சி , மல்லித்தழை எல்லாம் போட்டு நீர்மோர்ப் பந்தல் மாதிரி ஆக்கிவிட்டிருப்பார்கள். இங்கே அந்தக் கொடுமையை செய்யவில்லை. கிளீன் மோர்.

ஒரு முழுசாப்பாட்டின் விலை 110 ரூபாயாகிறது. தொகை கொஞ்சம் அதிகம்போல் தோன்றினாலும் தரத்திற்குத் தகும். அருகிலேயே இயற்கை அங்காடி கடை விரித்திருக்கிறார்கள். கருப்பு கவுணி அரிசி கால்கிலோ வாங்கிவந்தேன்.

என்றென்றும் புன்னகையுடன்

ஜீவன் சுப்பு

பேசாதவார்த்தைகள்#241119 ~ ஆதித்யவர்மா.

பேசாதவார்த்தைகள்#241119 ~ ஆதித்யவர்மா.

கேடி என்கின்ற கருப்புதுரை பார்ப்பதுதான் திட்டம். வழக்கம்போல , கேடி ஒரு காட்சிதான் அதுவும் காலைக்காட்சி மட்டும்தான் என்றும் , இப்போதைக்கு  ஆதித்தியவர்மா , சங்கத்தமிழன் இருக்கு என்று சொல்லி கவுன்டர்மஹான் சங்கைத்தடவ ஆரம்பித்தார். சங்கு முக்கியமென்பதினால் , ஆ.வர்மாவுக்கு ஒரு டிக்கெட் வாங்கி பதினாறாவதாக அமர்ந்தேன்.

வருடங்களுக்கு முன்பு திரையார்வலர்களால் சிலாகிக்கப்பட்ட தெலுங்கு அர்ஜூன் ரெட்டியின் தமிழ் "ரீ~ரீ மேக்" தான் ஆ.வர்மா. வழக்கமாக வரும் முகேஷ் விளம்பரம் இல்லாமலேயே படம் தொடங்கியது. முதற் சில காட்சிகள் த்ரீ ரோசஸ் விளம்பரப் பட பாணியில் நியூட்ரலாக போனது. அதற்கடுத்த பத்து நிமிடங்களும் டாப் கியரில் அடித்துதூக்கிவிட்டார்கள் இல்லை தூக்கி அடித்துவிட்டார்கள்.

ஆக்சுவலா தமிழக அரசியலில் வெற்றிடம் இருக்கிறதோ ; இல்லையோ , தமிழ் சினிமாவில் சாக்லேட் கம் ப்ளேபாய் கேரக்டருக்குமான வெற்றிடம் மேடிக்கு பிறகிலிருந்தே இருந்து வந்தது. மேடி இப்போது டாடியாகிவிட்டார்.( மோடின்னு வாசித்தவர்கள் எல்லாரும் தலையில் கொட்டிக்கொள்ளுங்கள் :))
எது ஆர்யாவா!? அதெல்லாம் ஆ.இ.ஊ.இ.பூ.ச. மேற்படி வெற்றிடத்தை துல்கர் சல்மான் , நிவின்பாலி, நானி, வி.தே.கொ போன்ற அண்டை மாநிலத்தவர்களைக் கொண்டே நேற்று வரை நிரப்பிவந்தோம். ஆம் , நேற்றுவரை. இனிமேலும் அண்டைமாநிலங்களை அண்ட வேண்டிய அவலமில்லை. ஆம். அவன் வந்துவிட்டான் ; அவன் வந்துவிட்டான்...!!!! துருவ்.

இருவது ஆண்டுகளுக்கு முன்பு கல்லூரி குட்டிச்சுவரில் அமர்ந்துகொண்டு அபிதாகுஜலாம்பாளை காதலித்துக் கொண்டிருந்த சீயான் விக்ரம் கண் முன்னே அன்னிச்சையாக வந்துபோகிறார். சில காட்சிகளில் குரலிலும்.

துருவ் பக்கா மணிரத்தினம் மெட்டீரியல். எப்டி மணி சார் மிஸ் பண்ணுனாருன்னு தெரியவில்லை. பயன்படுத்திக் கொண்டிருந்தால் நிச்சயமாக அவருக்கு ஒரு கம்பேக் மூவியாக இருந்திருக்கும். ட்ரெண்ட்ல சொல்லனும்னா துருவ் , மணி சாருக்கு வாய்ப்பு கொடுத்த மாதிரி இருந்திருக்கும். நக்கல் இல்லை உண்மையிலேயே.

ஹீரோயின் செலக்சனில் கோட்டை விட்டிருக்கிறார்கள் என்று சொல்கிறார்கள். அது வேண்டுமென்றே விட்ட கோட்டைதான் எனப்படுகிறது எனக்கு . சொல்லப்போனால் மிகச்சரியான தெரிவது. நாயகி இன்னும் கொஞ்சம் வனப்பாக , முக லட்சணமாக இருந்திருந்தால் , உடல் இச்சைக்காகத்தான் ஆதி மீராவை காதலித்தான் என்றாகிவிட வாய்ப்பிருக்கிறது. இரண்டாவது அந்தப்பெண் எப்படி உடனடியாக இசைந்தால் என்றொரு கேள்வி !? முத்தமிடுவதற்கு முன்பாகவே , மிகக்குறைவான காட்சிகளின் வழியாக , ஆதியைப் பற்றிய வரலாறு, உள்ளது உள்ளபடி சொல்லப்படுகிறது. மேலும் கலகலப்பான பெண்களைக்காட்டிலும் இதுபோன்று மருட்சியோடும் ; மூடியாகவும் இருப்பவர்கள்தான் சட்டென்று முடிவெடுப்பவர்களாக இருப்பார்கள். சோ அது இயல்பாகவே படுகிறது.

அட்டகாசமான ரொமான்ஸ் காட்சிகளிலெல்லாம் , தியாகராஜ ஆராதனையில் கீர்த்தனை வாசிப்பதைப்போல வாசித்திருக்கிறார் இசையமைப்பாளர். இசை சுமார்தான். ஆனால் அதையெல்லாம் துருவ நட்சத்திரம் கொண்டு ஈடு கட்டிவிட்டார்கள்.

லிப்லாப் காட்சிகளுக்கிடையே படம் நகர்கிறது. எதிலுமே விரசமில்லை. துருவ் தன் அப்பா விக்ரமிடம் கற்றுக்கொண்டதைவிட கலைத்தாயின் மூத்த மகனிடம் அதிகம் கற்றுக்கொண்டிருப்பார்போல.  என்னவொன்று நிறைய வசனங்கள் ஆங்கிலத்தில் , தமிழ் வசனங்கள் கூட அதி வேகத்தில் பேசப்படுகிறது. தமிழ் ரீ மேக்தானா என்று சந்தேகம் வருமளவிற்கு. நாயகனின் மருத்துவ நண்பராக வருபவர் கவனம் ஈர்க்கிறார். மற்ற கதாபாத்திரங்கள் எவருக்கும் வாய்ப்பில்லை. நாயகி உட்பட .

குடிகாரன் ; பெண் பித்தன் ; முரட்டு சுபாவம் உடையவன் ; சுயநலவாதி என்று ஆதி கேரக்டரின் மேல் ஏகப்பட்ட குற்றச்சாட்டு. ஆனால் முதல் காட்சியிலிருந்து கடைசிக் காட்சிவரை நேர்மையாகவே நடந்துகொள்கிறான் ஆதி. குறைந்தபட்சம் அவனுக்கு மட்டுமாவது. அது மட்டும் ஏன் சார் உங்க கண்களுக்கு தெரிவதே இல்லை. அயோக்கிய சிகமணிகளைவிட இதுபோன்று யோக்கிய சிக்காமணிகளிடம் தான் எச்சரிக்கையாக இருக்க வேண்டும்.

படம் நெடுக போதையில் புழங்குவதும் ; பார்க்கும் பெண்களை எல்லாம் படுக்கைக்கு கூப்பிடுவதெல்லாம் ஹீரோயிசமா!? இதெல்லாம் ஒரு படமா !? இதுதான் பண்பாடா , நகரீகமா என்று கொந்தளிப்பவர்களுக்கு. கூல் ...!!! படத்தில் எந்த இடத்திலும் அப்படி சொல்லவே இல்லை. ஆதி கதாபாத்திரம் யாரையும் வற்புறுத்துவதில்லை , பார்த்த மாத்திரத்தில் அழைப்பதுமில்லை. பரஸ்பரம் விரும்புபவர்களிடம் உறவு வைத்துக்கொள்கிறார் அல்லது உறவில் இருக்க விழைகிறார். பொதுநலம் ; அன்பு ; அக்கறை என்று ஆதி கம்பு சுத்துவதில்லை. ரெம்பவே பிராக்டிக்கலான ஆள். லீடிங் ஹீரோயினிடம் கூட பிஸிக்கலா ஹெல்ப் பண்ண முடியுமா என்றுதான் கேட்கிறார்.

இன்னொரு முக்கியமான விஷயம். இதெல்லாம் கலாச்சார சீரழிவு என்று பொங்கியெழுந்து அடக்கி அடக்கி வைத்தால் , சிறுமிகளிடம் சில்மிஷம் செய்து சீரழித்த கொடூரன் கைது என்ற சீழ்பிடித்த சமூகமாகத்தான் இன்னும் இருநூறு ஆண்டுகளுக்கும் இருப்போம்.

சிற்சில குறைகள் இருப்பினும் ; சில காட்சிகள் , வசனங்களில் வேற்று கருத்து இருப்பினும் படம் எனக்கு ரெம்ப பிடித்திருந்தது. வசனங்களை தெளிவு படுத்திக்கொள்வதற்காக இன்னுமொருமுறை பார்க்கவேண்டும்.

ஆதித்யாவர்மாவை பாலா இயக்கியிருந்தா எப்டி இருந்திருக்கும்னு நினைச்சுப்பார்த்தேன் ,கை அன்னிச்சையா குரல்வளையை தடவிக்கொள்கிறது. கண்டிப்பாக துருவை ஜோம்பியாக்கியிருப்பார். தேங் காட்.

என்றென்றும் புன்னகையுடன்
ஜீவன் சுப்பு.

பேசாத வார்த்தைகள் #030819-ஜீவி

அது ஆகச்சிறந்த மொக்கையாக இருந்தாலும் பரவாயில்லை ; டைரக்டரின் அடுத்த படத்தினை திரையரங்கில் தான் காணவேண்டும் . அதுதான் பொருத்தமான பாவமன்னிப்பாக இருக்கமுடியும். 

சசி, மாரி செல்வராஜ், சுரேஷ் சங்கையா, அறிவழகன், விக்ரம் சுகுமாரன், மகிழ்திருமேனி, நெல்சன் வெங்கடேசன், கோபிநாத் என பாவமன்னிப்பு கேட்க வேண்டிய இயக்குனர்களின் எண்ணிக்கை நாளுக்குநாள் அதிகரித்துக்கொண்டே போவது ஓர் ஆனந்தத்துயரம்.

கூப்பிய கரங்களுடன் தோன்றும் தயரிப்பாளரும் ; அதனைத்தொடர்ந்து மலைகளைப் பொளந்து கொண்டு சீறிப்பாய்ந்து வந்து ,நட்டுக்குத்தலாக நிற்கும் தயாரிப்பு நிறுவனத்தின் இலச்சினையும் மெல்லியதாக பீதியைக் கிளைப்பினாலும், வைத்த கண்ணை பின்வாங்குவதாக இல்லையென்று தொடர்ந்தாயிற்று.

பல படங்களில் பார்த்துச்சலித்த ஓப்பனிங் ஸீன் , பருந்துப்பார்வையில் சென்னை . ஆனால் , அதனைத்தொடர்ந்து வரும் ரவுண்டானாவும் , முதல் பாடலின் ஒளிப்பதிவும் , ஒளிப்பதிவாளர் யாரென்று கேட்கத்தோன்றுகிறது.

சிறப்பான பங்களிப்பை நல்கிடவேண்டுமென்ற முனைப்பு நாயகன் வெற்றியின் நடிப்பில் தெரிவதை அறிய முடிகின்றது. ஆனால் காணத்தான்முடியவில்லை. குரல், பார்வை, உடல்மொழி என்று ஒவ்வொன்றும் திசைக்கொன்றாக கும்மியடிக்கிறது. கருணாகரன், ரோகிணி, மைம் கோபி, இரண்டு நாயகிகள் , ஆய்வாளர் எல்லோருமே நிறைவு. இப்ராஹிமாக வருபவற்கு சிறப்பான எதிர்காலம் இருக்கவேண்டும் என்று விரும்புகிறேன். சில எபிஸோடுகளில் நம் பற்களை கலகலக்கவைத்தும் ; பல எபிஸோடுகளில் நம் பற்களைக் கடிக்கவைத்தவர்களுமான விஜய் டிவியின் சில முகங்கள் டைமிங்கில் சிரிக்க வைக்கிறார்கள்.

நகைச்சுவைக்கென்று தனித்த ட்ராக் இல்லாதபோதிலும் குறையில்லாமல் பார்த்துக்கொள்கிறார் குணச்சித்திரத்தில் பாந்தமாக பொருந்தியிருக்கும் கருணாகரன்.

தொடர்பியல், முக்கோணவிதி, மையபுள்ளி என்று அறிவியல் பேசும் படத்தில் , ஊழ்வினையையும் ஊடாக இழையோடவிட்டிருக்கிறார்கள். Really Refreshing. நிறைய காட்சிகளை/வசனங்களை மீள் பார்வைக்கு உட்படுத்தவேண்டியதிருந்தது எனக்கு.
வசனங்களை பாரதி எழுதியிருக்கிறார். டாபிக்கலான விஷயங்களையெல்லாம் போகிற போக்கில் தொட்டுச்சென்றிருக்கிறார்கள். ஊன்றிக் கேட்கவேண்டும். உதாரணமாக , காவல்நிலையத்தில் வைத்து வெற்றியை ஆய்வாளர் விசாரிக்கும் போது , அம்மா எப்படி செத்தாங்க என்று அதட்டலாக ஒரு கேள்வியை வீசுகிறார் ஆய்வாளர். அதற்கு வெற்றி பதில் சொல்லிக்கொண்டிருக்கும்போதே , கருணாகரன் ஒரு கமெண்ட் அடிக்கிறார். இதுபோன்று ஆங்காங்கே சமகால நடப்புகளை பகடியிருக்கிறார்கள். அது துருத்தாமல் இருப்பது சிறப்பு.வாழ்க்கையில வரக்கூடாத வியாதி விரக்தி என்று ஒரு வசனம் ~ பாபு தமிழ் உங்களுக்கு ஒரு பூச்செண்டு.

பெரிய குறையென்று பார்த்தால் , சம்பவம் நடைபெற்ற இடத்திலேயே ; சம்பவத்தைப் பற்றியே வெற்றியும், கருணாவும் அடிக்கடி வெகு சாவகாசமாக கதைத்துக்கொள்கிறார்கள். அதுவும் எப்படி என்றால் , பொங்கல் சிறப்புப் பட்டிமண்டப குரலில். ஆரம்ப காட்சிகள் கொஞ்சமே கொஞ்சம் வேகக்குறைவாக இருந்தபோதும் பழுதில்லை.

எங்கேயும் எப்போதும் படத்தில் , ஜெய் சொல்வதுபோல இந்த ஹீரோ தான் சார் பிடிக்கல ; மத்தபடி படம் லவ்யூங்க.

இந்தப்படத்தை விஜய் ஆண்டனியோ, அருள்நிதியோ பார்த்திருந்தால் அவர்கள் மைண்டவாய்ஸ் வடபோச்சே என்பதாகத்தான் இருந்திருக்கும். ஆம். இருவருக்குமே அளவெடுத்துத் தைத்த சட்டை போன்ற கதை, திரைக்கதை.

தமிழ் சினிமா ஒன்றில் , ஒரு கதாபாத்திரம் புத்தகம் வாசிப்பதாய் காண்பதே அரிதாகியிருக்கும் காலத்தில் , கதையின் நாயகனை புத்தக வாசிப்பாளராக சித்தரித்திருப்பது சிறப்பு. பட போஸ்டர்களில் கூட வாசிக்கும் நாயகனை காட்சிப்படுத்தியிருக்கிறார்கள். நன்றிகள்!!!

எழுத்தாளர் பாபு தமிழும், இயக்குனர் கோபிநாத்தும் ரசிகர்களை அறிவுஜீவிகள் என்று நம்பி மேற்படி படத்தை எடுத்திருக்கிறார்கள். ஆனால் வந்த வேகத்திலேயே படத்தை தியேட்டரை விட்டுத் தூக்கியடித்து , நாங்கள்லாம் அவ்ளோ ஒர்த் இல்ல பாஸ் என்றிருக்கிறோம் நாம். துயரம்.
#ஜீவி

பேசாத வார்த்தைகள் - 1 - 220119

வேலை நிமித்தம் வெளி மாநிலங்களில் தங்கியிருக்கும் தமிழர்களிடம் பேசியிருக்கிறீர்களா...!?? அவர்கள் சொல்லும் பொதுவான ஒன்று...எவ்வளவு வசதி, வாய்ப்பு இருந்தாலும் நம்மூரு போல வராது. குறிப்பாக வடகிழக்கு மாநிலங்களில் வசிப்பவர்கள் , இன்னும் ஒரு படி மேலே போய் , தமிழ்நாடு ஒரு சொர்க்கம் என்பார்கள். என்னாது சொர்க்கமா என்று கேட்கும் நமக்கு நகைப்பாக இருக்கும். ஆனால், ஒரு நாலு நாள் வடகிழக்கு மாநிலங்களில் போய் தங்கி இருந்து வந்தால் சூடம் ஏற்றி சத்தியம் செய்வோம், தமிழ்நாடு சொர்க்கம் தான் என்று.

ஏன்...!!? நிறைய இருக்கின்றது. மருத்துவம் , கல்வி, வேலைவாய்ப்பு, உணவு, சகிப்புத்தன்மை, பாதுகாப்பு , சீரான தட்பவெப்பநிலை இப்படி அடுக்கிக்கொண்டே போகலாம். அலுவலக வேலை நிமித்தம் கடந்த ஜூன் மாதம் , ஒரு வார பயணமாக பஞ்சாப் சென்று வந்தேன். காலை 5 மணி முதல் இரவு எட்டு மணி வரை வெயில் வீசும் நீண்ட பகல். வெயில்ன்னா 47 டிகிரி. கிட்டத்தட்ட எண்ணெய்ச் சட்டிக்குள் இருப்பது போல். என்னங்க இவ்ளோ வெயிலாக இருக்கிறது என்றால், நீங்கள் வெயில் காலத்தில் வந்திருந்தால் என்ன சொல்லுவீர்கள் என்று கேட்டு சிரிக்கிறார் பஞ்சாபி. ஆம்..!! ஐம்பது டிகிரியை தாண்டும் வெயிலும் , மைனஸில் அடிக்கும் குளிரும் அங்கு சர்வசாதாரணம். ஏப்ரல் மேயில் போனால் கருகிப்போய்விடுவோம். நவம்பர், டிசம்பரில் போனால் உறைந்துபோய் விடுவோம்.

சீரான தட்பவெப்பநிலை தமிநாட்டின் தனிச்சிறப்புகளில் ஒன்று. அதீத வெயிலோ, மழையோ, குளிரோ எதுவுமில்லை. எல்லாமே safe zoneக்குள்ளாகவே இருக்கும். முப்பது வருடங்களுக்கு முன்பு மீனவர்களுக்கு கூட வானிலை அறிக்கை அவசியமானதாக இருந்ததில்லை. 2000க்கு பிறகு வானிலை அறிக்கை பார்த்து கடலுக்கு போவது அத்தியாவசியமானது. அடுத்தடுத்த வருடங்களில் கடலோர மாவட்டங்கள், ஆற்றுக் கரையோர மாவட்டங்கள் எல்லாம் மழைக்காலங்களில் வானிலை அறிக்கை பார்க்கவேண்டிய கட்டாயத்திற்குள்ளானது. இப்பொழுது தண்ணியில்லா காட்டில் இருப்பவர்கள் கூட வானிலை அறிக்கை பார்க்கவேண்டிய அவல நிலையில் இருக்கிறோம். மழைக்காலங்களில் இப்படியென்றால் கோடைகாலத்தில் ஏழு எட்டு வருடங்களாக வெயிலும் காட்டு காட்டென்று காட்டிக்கொண்டிருக்கிறது. பெரியவர்கள், குழந்தைகள் எல்லாம் வெயில் தாங்காமல் சுருண்டு, துவண்டுவிடுகிறார்கள். சென்னை, வேலூர் போன்ற ஊர்களில் ஏ.சி இல்லாமல் இருக்கவே முடியாது என்கிற நிலை.

இந்த climate disasterல் புது வரவு குளிர். இரண்டு வருடங்களாக வதைத்துக்கொண்டு இருக்கிறது கடுங்குளிர். எம்மைபோன்ற வெப்ப ரத்தப்பிராணிகளுக்கு இது கொடுங்குளிர். தனிப்பட்ட முறையில் சாப்பாடு, தூக்கம் இதெற்கெல்லாம் தரைதான் சவுகர்யம் எனக்கு. இந்த கட்டில், மெத்தை, டைனிங் டேபிள் இதல்லாம் அசவுகர்யம். வெயில் காலத்தில் மெல்லிய பெட்சீட், மழைக்காலத்தில் கூடவே ஒரு பாய் இதுதான் பள்ளியறை கவசங்கள். போனவருட குளிருக்கு கம்பளி தேவைப்பட்டது. இந்த வருடம் தினம்தினம், தினுசு தினுஷாக முயற்சித்துக்கொண்டிருக்கிறேன். அறை ஜன்னலுக்கு ஒரு கம்பளி, தரையில் ஐந்தெடுக்கு விரிப்பு. முதலில் நியூஸ் பேப்பர், அடுத்து காரட்டன் பாக்ஸ் அதைத்தொடர்ந்து பாய், கம்பளி, பெட்சீட் . இதற்கும் மேல் ஸ்வெட்டர் போட்ட ஞான் , எனக்கும் மேலாக தடித்த போர்வை. இப்படியிருந்தும் நான்கு மணிக்கு நடுங்க ஆரம்பிக்கிறது உடல். நமக்குத்தான் வயசாயிடுச்சோ என்று நினைத்து , சமவயது சகாக்கள் சிலரிடம் விசாரித்தேன் , எல்லோருக்குமே இது கடுங்குளிராகத்தானிருக்கிறது. மார்கழிதான் முடிஞ்சுருச்சே இனியும் ஏன்யா  குளிராண்டவர் ஓவர் டைம் பார்க்குறார்ன்னுக்கேட்டா தைல தல நடுங்கும் ; தரையும் குளிரும்  , மாசில மரம் நடுங்கும் , மச்சும் குளிருங்குறாங்க . எனக்கு கொலநடுங்குது...!!!

குளோபல் வார்மிங்க் தான் காரணமா...!!? இல்லை வேறதுவுமா என்று தெரியவில்லை. ஆனால், தமிழ்நாட்டு தட்பவெப்பநிலை இப்படி சீர்குலைந்து சின்னாபின்னமாகி போய்க்கொண்டிருப்பது உள்ளபடியே அதிக வருத்தம் தருவதாக உள்ளது. அனேகமாக அடுத்தது மணற் காற்றாகத்தானிருக்கும். கெட் ரெடி மக்காஸ்.

@@@@@@@@@@@@@@@@@@@@@@@@@@@@@@@@@@@@@@@@@@@@

"வாங்க ஏழைகளே" என்ற நெல்சன் சேவியரின் இரண்டு வார்த்தை ஸ்டேட்டஸ் ஒன்றுக்கு வண்டை வண்டையாக வசை பாடியிருந்தார்கள் நூற்றுக்கணக்கானோர். அதையொட்டிய இன்னும் சில நண்பர்களின் போஸ்டும் காணக்கிடைத்தது. ஆனால் தெளிவாக விஷயம் என்னவென்று விளங்கவில்லை. பத்திரிக்கை வாசித்து அறிந்துகொண்டேன்.

உயர்சாதி ஏழைகளுக்கென்று பத்து சதவீத இட ஒதுக்கீட்டிற்கான மசோதாவை மத்திய அரசு நிறைவேற்றியிருக்கிறது. அதையொட்டிய கருத்து பகிர்வுதான் துர் நாற்றம் வரக்கூடிய அளவிற்க்கு முற்றியிருந்தது.வெற்றிகரமான தோல்வி மாதிரி , உயர்சாதி ஏழைகள்ன்ற பதமே நகை முரணாக தோன்றும். ஆனால் அப்படி ஒரு கூட்டம் இருந்தது, இருக்கிறது. இருக்கும். நான்கூட அந்த கூட்டத்தை சேர்ந்தவன்தான். உயர்சாதி ஏழைகளுக்கான இடஒதுக்கீட்டை நான் வரவேற்கிறேன். ஆனால் அதற்கு கொடுக்கப்பட்டிருக்கும் தகுதிபட்டியலை எதிர்க்கிறேன் . இவர்கள் சொல்லியிருக்கிற தகுதிகளை வைத்துப்பார்த்தால் இந்த ஜென்மம் முழுக்க நான் உயர்சாதி ஏழையாகத்தான் இருப்பேன் போல. இது ஏதோ ஓட்டரசியலுக்காக கொண்டுவரப்பட்ட மசோதாதான் என்று எண்ணத்தோன்றுகிறது

ஏன் வரவேற்கிறேன்.!?

பிறப்பால் உயர்சாதி. வாழ்ந்து கெட்ட குடும்பத்தின் வாரிசு. பிறந்ததில் இருந்து 22 வயது வரை வற்றாத வறுமை . ரேஷனில் அரிசி வாங்கி , கருவேலங் குச்சி பொறக்கி கரியடுப்பில் சமைத்து மதியத்திற்கு வேண்டுமென்று காலையில் அரைவயிரும், இரவிற்கு வேண்டுமென்று மதியம் அரைவயிரும், இரவில் அரைவயிருமாக , அரைவயிற்றுக் கஞ்சி குடித்து ஆளாக்கினார் அம்மா. பத்தாம் வகுப்பு முடித்தவுடன் , டிப்ளமோ படித்தால் சீக்கிரம் வேலைக்குபோய் முழு வயித்துக்கும் சாப்பிடலாம் என்றே பாலிடெக்னிக்கில் சேர்ந்தேன்.

பத்தாம் வகுப்பில் 416 மதிப்பெண்கள். அந்த வருடம் பார்த்து டிப்ளமோவிற்கும் கவுன்சிலிங் ஆரம்பித்தார்கள். அடகு வைத்த அம்மாவின் அரைபவுன் தோடு மூலம் கிடைத்த பணத்தைக்கொண்டு, மாமாவின் துணையோடு அண்ணா பல்கலைக்கழகம் போய்சேர்ந்தேன். காரைக்குடி அழகப்பாவில் சீட்டு கிடைத்தால் , தெரிந்த ஊர் , 50, 100 என்று சல்லிசான வாடகையில் வீடு பிடித்து அம்மாவும் உடன் வந்துவிடலாம். மாதா மாதம் விடுதிகட்டணம் கட்டவேண்டிய சுமை இல்லை என்று எண்ணி போயிருந்தோம். 84 சதவீத மதிப்பெண்கள் எடுத்தும் அழகப்பாவில் சீட் கிடைக்கவில்லை. காரணம் OC. அன்றைய தேதியில் எங்கள் குடும்ப ஆண்டு வருமானம் ஏழு, எட்டு ஆயிரம். அதுவும் நிரந்தரமில்லை. அறந்தாங்கி பாலிடெக்னிக்கில் இலவச இடம் கிடைத்தது. ஆனால் பிரச்சனை விடுதிகட்டணம். மாதா மாதம் ரூபாய் 650 கட்டியாக வேண்டும்.

செய்வதறியாமல் திகைத்து நின்றேன். எங்களது பொருளாதார நிலையறிந்த அலுவலகர் , நீங்க 500 , 1000 செலவு பண்ணியிருந்தா BC ன்னு மாத்தியிருக்கலாமே என்றார் . எனக்கு அம்மாமேல் கோபமாக வந்தது. அம்மாவுக்கு அப்பாமேல் கோவம் வந்தது. கடைசியில் மூன்று வருடத்திற்கும், மாதா மாதம் சரியான தேதியில் விடுத்திகட்டணம் கட்டாததற்கு அபராதம் விதிக்கப்படும் என்றும், விடுதியை விட்டு நீக்கப்படும் என்று எச்சரிக்கை கடிதம்தான் வந்தது.

தெரிந்தவர், தெரியாதவர், என்று பலரின் உதவியோடும் , அம்மாவின் கல்யாணத்திற்கு சீர்வரிசையாக கொடுத்த அண்டா, குண்டான், தாலி ,தோடு என்று அடகு வைத்தது மூலமும் படித்து முடித்தேன். பத்துபைசா ஸ்காலர்ஷிப் இல்லை. கேட்ட கல்லூரியில் கேட்ட இடம் கிடைக்கவில்லை. படிப்பின் மீதே வெறுப்பு. உயர் சாதியில் ஏழையாய் பிறப்பதெல்லாம் பெருந்துயரம். உறவோடும் ஒட்ட முடியாது. ஊரோடும் ஒன்ற முடியாது.

விடுதிக்கட்டணத்திற்காகவும், தேர்வு கட்டணத்திற்காகவும்  வாங்கிய 20 ஆயிரம் ரூபாய் கடனை அடைப்பதற்கு மூன்று வருடங்கள் முழுமையாக தேவைப்பட்டது எனக்கு. வேலைக்கு சேர்ந்து ஐந்து வருடங்கள் கழித்து , இருபத்தி ஐந்தாவது வயதில் தான் எங்கள் 400 சதுர அடி ஓட்டு வீட்டிற்கு மின்சார இணைப்பே கொடுக்க முடிந்தது. இப்பொழுது மெல்ல எழுந்தாயிற்று. ஏதோ 2 சென்ட் இடமும், நாலைந்து பவுன் நகையும் கூடவே ஒற்றைப்பிள்ளையாய் பிறந்ததாலும் இந்த அளவிற்கு படித்து மேலே வர முடிந்தது. இதுவும் இல்லாத உயர்சாதி ஏழைகள் நிலைமை ரெம்ப மோசம்.

ஏன் எதிர்க்கிறேன்...!!?

இன்றைய தேதியில் ஜாதிச்சான்றிதழையே எளிதாக  corrupt செய்து கரெக்ட் செய்ய முடிகிறது. வருமான வரி சான்றிதழ் எல்லாம் ஒரு விஷயமே இல்லை. இரண்டாவது,  8 லட்ச ரூபாய் ஆண்டு வருமானம், ஐந்து ஏக்கர் நிலமெல்லாம் இருந்தால் அரசாங்கத்திடமிருந்து குண்டுமணி அளவிற்கு கூட மானியமோ, சலுகையோ தேவையில்லை. அரசு கூறியிருக்கும் இரண்டு தகுதியும் எனக்கு இருக்கிறது ஆனாலும் இட ஒதுக்கீடு இல்லாமலே என்னால் என் குடும்பத்தை என் குழந்தையை சிறப்பாக படிக்க வைக்க வாழ வைக்க இயலும். எல்லாருமே விட்டுக்கொடுக்க மாட்டார்கள். உதாரணத்திற்கு 8 லட்ச ரூபாய் வருமானமுள்ள ஒருவர் சட்டத்தில் இருக்கும் ஓட்டையை பயன்படுத்தி சலுகையை அனுபவிப்பார்கள். என்பாதாயிரம் ரூபாய் கூட வருமானம் இல்லாதவர்கள் இல்லாமலே போவார்கள். இதற்கு அதிகபட்ச வாய்ப்பிருக்கிறது.

இரண்டரை லட்சம் ஆண்டு வருமானம் இருந்தாலே வருமான வரி வரம்பிற்குள் வரும் ஒருவர் எப்படி உயர்சாதி ஏழை வரம்பிற்குள்!!?? ஒரு லட்சத்திற்கும் குறைவான வருமானம், ஒரு சென்ட் இடத்திற்கும் குறைவான நிலம் அல்லது , வீடு வைத்திருப்பவர்கள் மட்டுமே தகுதியானவர்கள் என்று அறிவித்தால் 50 சதவிகிதமாவது உபயோகமாக இருக்கும். ஆனால் அதிலும் தில்லு முல்லு செய்பவர்கள் இருக்கத்தான் செய்வார்கள். இட ஒதுக்கீடுதான் வேண்டுமென்று இல்லை, பொருளாதார உதவி என்ற வகையிலாவது அவசியம் உதவவேண்டும். ஏனெனில் உயர்சாதியில் ஏழையாய் பிறப்பது அந்த குழந்தையின் தவறல்லவே.

என்றென்றும் புன்னகையுடன்

ஜீவன்சுப்பு.